ایمازون نےدوبارہ قابل استعمال کاغذکی پیکجنگ متعارف کرادی

ایک نیوز:ایمازون نے اپنی شپمنٹ کے لیے استعمال کیے جانے والے پلاسٹک ببل میلر اور ایئر پلو کو تَرک کرنے کے وعدے پر عملدرآمد کرتے ہوئے دوبارہ قابلِ استعمال کاغذ کی پیکجنگ متعارف کرا دی۔
کمپنی کی جانب سے کیے جانے والے اعلان کے مطابق امریکی ریاست اوہائیو کے شہر یوکلِڈ میں جدید پیکجنگ مشین کی حامل ایک فیسلٹی تیار کی ہے جو خودبخود اشیاء کو خاص ڈبوں میں بند کرسکتی ہے (چھوٹی اشیاء کو کاغذ کے بنے میلر میں لپیٹ سکتی ہے) اور ڈبے کے اندر پلاسٹک کے فلر کے بجائے کاغذ کے فلر بھر سکتی ہے۔
ایمازون کی جانب سے غیر پلاسٹک مواد کی جانب منتقلی جولائی میں پلاسٹک میلرز کے خاتمے کے حوالے سے کیے جانے والے وعدے کے بعد عمل میں آئی ہے۔
نان-پیڈڈ پیپر میلر پلاسٹک میلر کے مقابلے میں زیادہ پائیدار نہیں ہوتے لیکن ایمازون کا کہنا ہے کہ کمپنی نے ایسے پیپر رول بنائے ہیں جو کھنچ سکتے ہیں، حرارت سے سِیل کیے جاسکتے ہیں، ان میں موسم کی مزاحمت کرنے کی صلاحیت ہوتی ہے اور ان کو دوبارہ استعمال کیا جاسکتا ہے۔
ماحول کے تحفظ کے لیے کام کرنے والے ایک ادارے اوشیانا کے سینئر وائس پریزیڈینٹ میٹ لٹل جون کے مطابق کمپنی کا یہ اقدام کمپنی کے پلاسٹک کچرے اور پلاسٹک کی آلودگی، جو ممکنہ طور پر سمندروں تک پہنچ سکتی ہے، میں کمی لائے گا۔