ویب ڈیسک:واشنگٹن ایئر پورٹ کے قریب مسافر طیارے اور فوجی ہیلی کاپٹر کے آپس میں ٹکرانے کی کچھ وجوہات سامنے آئی ہیں۔
امریکی میڈیا کے مطابق حادثے کے نتیجے میں طیارے اور ہیلی کاپٹر میں سوار تمام 67 افراد ہلاک ہوگئے ہیں۔
رپورٹس کے مطابق رونالڈ ریگن ایئر پورٹ کا کنٹرول ٹاور سٹاف کی کمی کا شکار تھا جہاں 2 کی جگہ ایک کنٹرولر سے کام لیے جانے کاانکشاف ہوا ہے جبکہ ایک روز قبل بھی ایک پرواز کو راستہ تبدیل کرنے پر مجبور کیا گیا تھا۔
حادثے کا شکار مسافر طیارے کے پائلٹ کو آخری لمحے میں ہدایت دی گئی تھی کہ وہ رن وے تبدیل کرلے جس کے بعد جہاز نے رخ تبدیل کرلیا تھا۔
رپوٹس میں بتایا گیا ہےکہ حادثے سے 30 سیکنڈ پہلے ہیلی کاپٹر کو ہدایت دی گئی کہ آگے بڑھنے سے پہلے مسافر طیارے کو گزرنے دو لیکن کوئی جواب نہ ملا جس کے بعدزیرتربیت فوجی ہیلی کاپٹر مسافرطیارے سے ٹکراگیا۔
امریکی میڈیا کا کہنا ہےکہ تباہ ہونے والے جہاز اور ہیلی کاپٹر کے بلیک باکس مل چکے ہیں۔
میڈیا رپورٹس کے مطابق اہم ایئر پورٹ کے پاس زیرتربیت فوجی ہیلی کاپٹروں کو پرواز کی اجازت پرسوالات پیدا ہوگئے ہیں۔