ایک نیوز نیوز: اقوام متحدہ کے اقتصادی اور سماجی کمیشن برائے مغربی ایشیا کے جاری سروے کے مطابق عرب ممالک کی ایک تہائی آبادی غربت کا شکار ہیں۔
غیرملکی خبررساں ادارے کے مطابق اقوام متحدہ کے سروے آف اکنامک اینڈ سوشل ڈویلپمنٹ ان عرب ریجن میں کہا گیا ہے کہ خلیج تعاون کونسل ممالک اور لیبیا کو چھوڑ کر عرب خطے کے 130 ملین افراد غربت سے متاثر ہیں ۔
سروے میں بتایا گیا کہ آئندہ دو سالوں میں غربت کی سطح میں مزید اضافے کی توقع ہے، جو 2024 میں آبادی کے 36 فیصد تک پہنچ جائے گی۔
سروے کے مطابق خطہ عرب میں 2022 میں بے روزگاری کی شرح 12 فیصد درج کی گئی ہے، جو کہ 2023 میں کم ہو کر 11.7 فی صد ہونے کے امکانات ہیں۔
سروے میں امید ظاہر کی گئی ہے کہ خطے کی مجموعی پیداوار میں 2023 میں 4.5 فی صد اور 2024 میں 3.4 فی صد اضافہ ہو گا۔
سروے کے سرکردہ مصنف احمد مومی کا کہنا ہے کہ خلیج تعاون کونسل ممالک اور دیگر تیل برآمد کرنے والے ممالک توانائی کی بلند قیمتوں سے مستفید ہوتے رہیں گے جبکہ تیل درآمد کرنے والے ممالک کئی سماجی اوراقتصادی چیلنجوں کا شکار ہوں گے ، جن میں توانائی کی بڑھتی قیمتوں، خوراک کی فراہمی میں کمی، اور سیاحت اور بین الاقوامی امداد کی آمد میں کمی شامل ہے۔