ایک نیوز: چیئرمین پاکستان تحریک انصاف اور سابق وزیراعظم عمران خان نے 9 مئی کے واقعات کی تحقیقات کیلئے قائم کردہ جے آئی ٹی کے سامنے پیش نہ ہونے کا فیصلہ کیا ہے۔
ذرائع کے مطابق سابق وزیراعظم عمران خان خود مشترکہ تحقیقاتی ٹیم کے سامنے پیش نہیں ہوں گے، عمران خان کا نمائندہ جے آئی ٹی کے سامنے پیش ہوگا، چیئرمین پی ٹی آئی نمائندے کی وساطت سے جے آئی ٹی کے سوالات کے جواب دیں گے۔
لاہور کے ڈپٹی انسپکٹر جنرل (ڈی آئی جی) پولیس کی جانب سے جاری نوٹس میں کہا گیا ہے کہ عمران خان تفتیش میں شامل ہونے کے لیے 30 مئی کو 4 بجے ڈی آئی جی کے دفتر میں پیش ہوں۔
واضح رہے کہ جے آئی ٹی کی جانب سے چیئرمین تحریک انصاف کو جناح ہاؤس اور عسکری ٹاور میں جلاؤ گھیراؤ کیس میں آج شام 4 بجے ڈی آئی جی انویسٹی گیشن آفس قلعہ گجر سنگھ میں طلب کیا گیا ہے۔
یاد رہے کہ 9 مئی کے واقعات پر پنجاب حکومت نے 10 مختلف جے آئی ٹیز بنائی تھیں، عمران خان تھانہ سرور روڈ، شادمان اور ریس کورس سمیت دیگر تھانوں میں درج ہونے والے مقدمات میں نامزد ہیں۔
ادھر عمران خان آج لاہور ہائی کورٹ اور انسداد دہشت گری کی خصوصی عدالت میں بھی پیشی متوقع ہے۔ وہ اے ٹی سی میں تین مقدمات میں عبوری ضمانتوں کے ضمانتی مچلکے جمع کرائیں گے۔