ایک نیوز:آئی ایس پی آر کے مطابق شمالی وزیرستان کے علاقہ میر علی میں خوارج کا مقابلہ کرتے ہوئے جام شہادت نوش کرنیوالے 29سالہ میجر حمزہ اسرار کی نماز جنازہ چکلالہ گیریژن راولپنڈی میں ادا کر دی گئی۔
پاک فوج کے شعبہ تعلقات عامہ (آئی ایس پی آر ) کے مطابق شہید کی نماز جنازہ میں آرمی چیف جنرل عاصم منیر ، وزیراعظم محمد شہباز شریف،نائب وزیر اعظم و وزیر خارجہ سینیٹر محمد اسحاق ڈار، وزیر دفاع خواجہ آصف اور وزیر اطلاعات عطاء تارڑ نے شرکت کی۔
آئی ایس پی آر کے مطابق سینئر حاضر سروس اور ریٹائرڈ فوجی افسران و اہلکاروں کی جانب سے شہید کو خراج عقیدت پیش کیا گیا ۔
پاکستان کے بہادر شہداء کی قربانیوں کو خراج عقیدت پیش کرتے ہوئے وزیراعظم نے دہشت گردی کے خاتمے کے لیے قوم کے غیر متزلزل عزم کا اعادہ کیا، انہوں نے اس بات پر زور دیا کہ ایسی اعلیٰ قربانیاں قومی عزم کو تقویت دیتی ہیں اور آنے والی نسلوں کے لیے پرامن اور محفوظ پاکستان کو یقینی بنانے کے لیے اجتماعی یقین کو تقویت دیتی ہیں۔
وزیراعظم کا مزید کہنا تھا کہ پوری قوم دہشت گردی کے خلاف پرعزم جنگ میں مسلح افواج اور قانون نافذ کرنے والے اداروں کے ساتھ مکمل یکجہتی کے ساتھ کھڑی ہے۔
ترجمان پاک فوج کے مطابق نماز جنازہ کے بعد شہید میجر حمزہ اسرار کی جسد خاکی کو ان کے آبائی گاؤں پہنچا دیا گیا، جہاں انہیں پورے فوجی اعزاز کے ساتھ سپرد خاک کیا جائے گا۔