ایک نیوز نیوز: ترجمان پاک فضائیہ کی جانب سے جاری کردہ بیان کے مطابق پاکستان ایئرفورس ( پی اے ایف) اکیڈمی، اصغر خان میں 146ویں جی ڈی (پی) ، 92ویں انجینئرنگ، 102 ویں ایئر ڈیفنس، 92 اور 94ویں رائل سعودی ائیر فورس کیڈٹس کے کورسز کی گریجویشن تقریب منعقد کی گئی۔ جس کے مہمان خصوصی چیئرمین جوائنٹ چیفس آف اسٹاف کمیٹی جنرل ندیم رضا تھے۔ اکیڈمی پہنچنے پر ایئر وائس مارشل محمد قیصر جنجوعہ، ایئر آفیسر کمانڈنگ پی اے ایف اکیڈمی اصغر خان نے مہمان خصوصی کا استقبال کیا۔
ترجمان کے مطابق پاسنگ آؤٹ پریڈ کی تقریب میں کل 115 ایوی ایشن کیڈٹس، 10 جنٹلمین کیڈٹس اور 22 رائل سعودی ایئر فورس کیڈٹس گریجویٹ ہوئے۔ تقریب کے مہمان خصوصی نے فارغ التحصیل ہونے والے کیڈٹس کو برانچ انسگنیا اور نمایاں کارکردگی دکھانے والے گریجویٹس کو ٹرافیوں سے نوازا۔
بیان کے مطابق جنرل سروس ٹریننگ میں بہترین کارکردگی پر چیئرمین جوائنٹ چیفس آف اسٹاف کمیٹی کی ٹرافی ایوی ایشن کیڈٹ اکیڈمی انڈر آفیسر صبیح الدین نے اپنے نام کی۔ انجینئرنگ ڈسپلن میں بہترین کارکردگی پر چیف آف دی ائیر اسٹاف ٹرافی ایوی ایشن کیڈٹ سکواڈرن انڈر آفیسر محمد ثاقب شیر کو دی گئی۔
اسی طرح فلائنگ ٹریننگ میں شاندار کارکردگی پر چیف آف دی ائیر اسٹاف بہترین پائلٹ ٹرافی ایوی ایشن کیڈٹ احسن علی خٹک نے اپنے نام کی۔ 92 ویں رائل سعودی ائیر فورس کیڈٹس کورس کی بہترین الائیڈ کیڈٹ ٹرافی رائل سعودی ائیر فورس کے کیڈٹ فہد مبارک الجوہانی نے جیتی۔ 94 ویں رائل سعودی ائیر فورس کیڈٹس کورس کی بہترین الائیڈ کیڈٹ ٹرافی رائل سعودی ائیر فورس کے کیڈٹ ولید خالد عبداللہ الترکی کو دی گئی۔
ترجمان کے مطابق کالج آف ایروناٹیکل انجینئرنگ میں مجموعی طور پر بہترین کارکردگی کی اعزازی تلوار ایوی ایشن کیڈٹ اسکواڈرن انڈر آفیسر محمد ثاقب شیر نے حاصل کی۔ کالج آف فلائنگ ٹریننگ میں مجموعی طور پر بہترین کارکردگی پر ایوی ایشن کیڈٹ محمد سعد بنگش کو اعزازی تلوار سے نوازا گیا۔
اس موقع پر مہمان خصوصی چیئر مین جوائنٹ چیفس آف اسٹاف کمیٹی جنرل ندیم رضا نے اپنے خطاب میں کہا کہ پاکستان ایک امن پسند ملک ہے جو باہمی احترام اور پرامن بقائے باہمی کے آئیڈیل پر قائم ہے۔ پاکستانی قوم اور ہماری مسلح افواج نے علاقائی استحکام اور عالمی امن کے لیے عظیم قربانیاں دی ہیں۔ ہم بدلتی ہوئی علاقائی اور عالمی صورتحال سے پوری طرح باخبر ہیں اور کسی بھی ملک کو غیر مستحکم علاقائی صورتحال کا فائدہ اٹھاتے ہوئے پاکستان کے خلاف جانے کی اجازت نہیں دی جائے گی۔
ترجمان کے مطابق تقریب کے بعد پی اے ایف اکیڈمی ایروبیٹکس ٹیم "شیردلز" کی طرف سے ایک سنسنی خیز ہوائی ڈسپلے پیش کیا گیا۔ ٹیم "شیردلز" نے اعلیٰ معیار کی فارمیشن ایروبیٹکس اور فلائنگ ڈسپلے کے ذریعے شائقین کے دل موہ لیئے۔