ایک نیوز: آئی ایس پی آر کےمطابق سربراہ پا ک فضائیہ ائیر چیف مارشل ظہیر احمد بابر سدھو سے روس کے نائب وزیر دفاع کرنل جنرل الیگزینڈر وی فومین کی قیادت میں اعلیٰ سطحی وفد نے ملاقات کی ہے۔
پاک فوج کےشعبہ تعلقات عامہ(آئی ایس پی آر ) کےمطابق روسی کے نائب وزیر دفاع کرنل جنرل الیگزینڈر وی فومین کی قیادت میں اعلیٰ سطحی وفد نے ائیر ہیڈ کوارٹرز اسلام آباد میں پاک فضائیہ کے سربراہ ائیر چیف مارشل ظہیر احمد بابر سدھو سے ملاقات کی ، ملاقات میں باہمی فوجی تعاون کو فروغ دینے پر بات چیت ہوئی، مشترکہ فوجی مشقوں اور پاک فضائیہ کے اثاثوں کے لئے تکنیکی معاونت پر بھی تبادلہ خیال کیا گیا ۔
آئی ایس پی آر کےمطابق ایئر چیف نے روس کے ساتھ فوجی تعلقات کو مضبوط بنانے پر زوردیا،ظہیر احمد بابر سندھو نے تربیتی پروگراموں اور مشترکہ فوجی مشقوں پر بھی زور دیا۔
آئی ایس پی آر کےمطابق روسی نائب وزیر دفاع نے موجودہ قیادت میں پاک فضائیہ میں حالیہ متاثر کن پیشرفت کو سراہا ، کرنل جنرل الیگزینڈر وی فومن نے ملٹری ٹو ملٹری تعاون اور پاک فضائیہ کیلئے تکنیکی معاونت کیلئے تعاون کےعزم کا اظہار کیا ۔