ویب ڈیسک:اسرائیلی وزیر اعظم نیتن یاہو نے یرغمالی شہریوں کے لواحقین کو یقین دلاتے ہوئے کہا ہے کہ ہم رفح میں داخل ہونے کی تیاری کر رہے ہیں اور اپنے کسی یرغمالی کو وہاں نہیں چھوڑیں گے۔
ٹائمز آف اسرائیل کے مطابق یرغمالیوں کے اہل خانہ سے گفتگو کرتے ہوئے وزیر اعظم بنیامن نیتن یاہو نے کہا ہے کہ صرف فوجی دباؤ ہی زیر حراست افراد کی رہائی کی ضمانت دے گا، حماس پر مسلسل فوجی دباؤ ڈال رہے ہیں اور اسے جاری رکھیں گے، یہی دباؤ یرغمالیوں کی واپسی کی ضمانت ہے، اسرائیل رفح میں داخل ہونے کی تیاری کر رہا ہے اور وہ اپنے کسی شہری کو وہاں نہیں چھوڑے گا۔
واضح رہے کہ امریکا اور عالمی برادری کی تنقید اور حملے سے باز رہنے کی تنبیہ کے باوجود اسرائیلی وزیر اعظم رفح پر حملے کی منصوبہ بندی جاری رکھے ہوئے ہیں، اسرائیل رمضان المبارک کے بعد سے ہی رفح پر حملے کی تیاری کر رہا ہے جبکہ امریکا حوصلہ شکنی کیلئے کوشاں ہے۔
حال ہی میں امریکا نے اسرائیل سے متبادل منصوبوں پر غور کرنے کا مطالبہ کیا ہے۔