صدرپاکستان کا چین کے صدرکو خط ،چینی سال نوپرمبارکباددی

 ایک نیوز: صدر مملکت آصف علی زرداری نےچین کے صدر شی جن پنگ کو خط لکھا ہے، صدر آصف علی زرداری نے چینی سال نو/ موسم بہار کے تہوار کے موقع پر صدر شی جن پنگ کو مبارکباددی۔
  صدر مملکت نے خط میں پاکستان اور چین کے مابین "آہنی دوستی" مضبوط بنانے کے عزم کا اعادہ کیا، صدر پاکستان کا کہنا تھا کہ دوطرفہ تعاون مضبوط بنانے اور دوستی کے بندھن کو آگے بڑھانے کیلئے بیجنگ میں چینی صدر سے تبادلہ خیال کا منتظر ہوں، پاکستان ون چائنہ پالیسی کی حمایت جاری رکھے گا، ون چائنہ پالیسی پاکستان کی خارجہ پالیسی کا اہم حصہ ہے،دونوں ممالک کے درمیان سدابہار تزویراتی تعاون کی شراکت داری ہے۔
صدر کاکہنا تھا کہ دونوں ممالک کی قیادت کی پے در پے نسلوں کی انتھک کوششوں نے بین الریا ستی تعلقات کے اس منفرد اور مثالی بندھن کو پروان چڑھایا اور مضبوط کیا، صدر مملکت نے خط میں پاک چین تعلقات اور پاک چین اقتصادی راہداری کو آگے بڑھانے میں چینی صدر کی بصیرت انگیز قیادت کا شکریہ ادا کیا۔
صدر مملکت نے کہا کہ چین نے سال 2024 میں مختلف شعبوں میں نمایاں پیش رفت کی، صدر مملکت نے خط میں پاکستان اور چین کے درمیان پائیدار اور مسلسل بڑھتی ہوئی دوستی کو سراہا، صدر مملکت نے صدر شی جن پنگ کی صحت، چینی عوام کی مسلسل ترقی اور خوشحالی کے لیے نیک خواہشات کا اظہارکیا۔