16ویں عالمی اردو کانفرنس 30نومبرسےشروع ہوگی

ویب ڈیسک:آرٹس کونسل آف پاکستان کراچی کے زیر اہتمام چار روزہ ’سولہویں عالمی اردو کانفرنس‘ کا آغاز 30 نومبر سے ہوگا۔
 صدر آرٹس کونسل محمد احمد شاہ، معروف شاعر افتخار عارف، غازی صلاح الدین، نور الہدیٰ شاہ ، قدسیہ اکبر اور سیکریٹری آرٹس کونسل اعجاز فاروقی نے بریفنگ دی۔
محمد احمد شاہ نے اس موقع پر کہا کہ 30 نومبر کو شام 4 بجے چار روزہ 16 ویں عالمی اردو کانفرنس کا افتتاح وزیراعلیٰ سندھ جسٹس (ر) مقبول باقر کریں گے، کانفرنس میں 200 سے زائد ادیب شرکت کریں گے، بھارت سے گلزار اور جاوید صدیقی آن لائن شریک ہوں گے۔
افتخار عارف نے کہا کہ احمد شاہ اور ان کی ٹیم کو مبارکباد دیتا ہوں کہ اتنی بڑی کانفرنس کرنے جارہے ہیں، اس کانفرنس میں نہ صرف کراچی بلکہ پوری دنیا سے لوگ شامل ہوتے ہیں، ملک کی مختلف زبانوں کو ایک چھت تلے جمع کرنا بہت بڑی بات ہے، اس عمارت کو اب دیکھتا ہوں تو بہت خوشی ہوتی ہے، احمد شاہ کی ادب کے لیے خدمات قابل تعریف ہیں۔