ننکانہ صاحب،باباگرونانک کے جنم دن کی تقریبات اختتام پذیر

ویب ڈیسک :ننکانہ صاحب میں بابا گورونانک کے جنم دن کی تقریبات، نگرکیرتن کا روایتی جلوس نکالا گیا۔
ننکانہ صاحب میں بابا گورونانک کے جنم دن کی تقریبات کے آخری روز نگر کیرتن کا روایتی جلوس نکالا گیا، جس میں بھارت سمیت مختلف ملکوں سے آئے سکھ یاتریوں نے شرکت کی۔
سکھوں کے روحانی پیشوا بابا گورونانک کے 554 ویں جنم دن کی تین روزہ  تقریبات کے آخری روز  ننکانہ صاحب میں گوردوارہ جنم استھان سے نگر کیرتن کا روایتی جلوس نکالا گیا۔
جلوس میں بھارت سمیت مختلف ملکوں سے آئے سکھ یاتریوں نے شرکت کی، جلوس گوردوارہ کیارہ صاحب پہنچ کر اختتام پذیر ہوا۔
نگران وفاقی وزیر برائے مذہبی امور  انیق احمد نے بھی بابا گورونانک کے جنم دن کی تقریبات میں شرکت کی۔ ان کا کہنا تھا کہ ننکانہ صاحب کے گوردواروں کی تزئین و آرائش کے لیے فنڈز مختص کر دیے ہیں، سکھ یاتری اپنے اپنے ملکوں میں جا کر بتائیں کہ پاکستان محبت کرنے والوں کی سرزمین ہے۔
نگران وزیر اطلاعات پنجاب عامر میر  نے بھی ننکانہ میں گوردوارہ جنم استھان کا دورہ کیا اور سکھ یاتریوں کی سہولت کے لیے اٹھائےگئے انتظامات کا جائزہ لیا۔
 بابا گورونانک کے جنم دن کی تقریبات رات گئے ارداس اور بھوگ رسم کے بعد ختم ہوں گی۔