ایک نیوز:لیہ اور اسلام آباد کے بعد گوجرانوالا میں بھی بھوک اور افلاس سے تنگ بچی نے پولیس سے مدد مانگ لی۔
پولیس کے مطابق گوجرانوالا کے علاقے عثمان پارک کی رہائشی 12 سالہ بچی نے 15 پر کال کی اوربتایا کہ والد ٹریفک حادثے میں زخمی ہو گئے ہیں اور چھوٹے بہن بھائی بھوکے ہیں۔
تھانہ سیٹلائٹ ٹاؤن کی پولیس وین کو متعلقہ ایڈریس پر بھجوایا گیا تو پولیس کے جانے پر معلوم ہوا کہ گھر میں بچی اس کے چار چھوٹے بہن بھائی، زخمی والد اور والدہ تھیں۔
ایس ایچ او نے کہا کہ میری جیب میں جتنے پیسے تھے راشن لیکر بچی کےگھر دے آیا ہوں۔
انہوں نے بتایاکہ بچی سے پوچھا کہ پولیس ہیلپ لائن پر کال کرنے کا خیال کیسے آیا؟ تو بچی نے بتایا کہ اس نے ٹی وی پر دیکھا تھا کہ پولیس والے راشن دے رہے ہیں۔
خیال رہے کہ گزشتہ دنوں لیہ اور اسلام آباد میں بھی بچوں کی بھوک، تنگدستی اور مہنگائی سے تنگ افراد نے ون فائیو کو مدد کی دہائی دی اور پیٹ کی آگ بجھانے کی درخواست کی تھی۔