وزیراعظم نے کراچی میں کے 4 منصوبے کا سنگ بنیاد رکھ دیا

ایک نیوز: وزیراعظم شہباز شریف نے کراچی کے لیے پانی کی فراہمی سے متعلق کے 4 منصوبے کا سنگ بنیاد رکھ دیا۔
وزیراعظم شہباز شریف ایک روزہ دورے پر کراچی پہنچے جہاں انہوں نے کے 4 منصوبے کا سنگ بنیاد رکھا۔ اس موقع پر چیئرمین بلاول بھٹو زرداری ، وزیراعلیٰ سندھ مراد علی شاہ بھی موجود تھے۔
تقریب سے خطاب کرتے ہوئے وزیراعظم شہبازشریف کا کہنا تھا کہ تمام شرکا کو سلام پیش کرتا ہوں، یہاں بڑی تفصیل کےساتھ گفتگو کی گئی، پیپلزپارٹی اور ایم کیوایم کےرہنماؤں نےمیٹھی بات کی۔
وزیراعظم کا کہنا تھا کہ پیپلزپارٹی اور ایم کیوایم ہماری اتحادی جماعتیں ہیں، پارلیمان میں جس اتحاد کا مظاہرہ کیا اس نے تمام سازشیں ختم کردیں، سازش کے تانے بانے سمندر پار تک ہیں، 9 مئی کو عمران نیازی کے اکسانے پر جتھوں نے فوجی تنصیبات پر حملے کیے، وہ دن تاریخ کا ایک سیاہ باب تھا، افراتفری کی سیاست کا9مئی کےالمناک واقعات پراختتام ہوا۔
شہبازشریف نے کہا کہ پچھلے ایک سال میں سیاسی افراتفری کی وجہ سے پاکستان ترقی نہ کرسکا، سابق وزیراعظم نے کراچی کے پانی کے مسئلےپرتوجہ نہیں دی، کے 4 منصوبے کو جس طرح سردخانے کے نذر کیا گیا افسوس ناک بات ہے، ہرمنصوبے میں ان کی فتنے پرمبنی سوچ تھی، چور کا نعرہ لگانے والا اب خود کیس میں آیا ہے، ہم پر بھی بڑے بڑے امتحانات آئے، لیکن کبھی نہیں کہا کہ جی ایچ کیو پر حملہ کردو، یہ وہ قوم کےعظیم سپوت ہیں جنہوں نےاپنی جانیں دیں۔