ایک نیوز :برطانوی شہر برمنگھم میں جاری ورلڈ بلائنڈ گیمز کے کرکٹ کے مقابلوں میں بنگلادیش کو شکست دیکر بھارت نے فائنل کیلئے کوالیفائی کر لیا، فائنل آج پاکستان اور بھارت کے درمیان کھیلا جائے گا۔
ورلڈ بلائنڈ گیمز کرکٹ کے اہم کوالیفائنگ میچ میں بھارت نے بنگلہ دیش کو 7 وکٹوں سے شکست دیکر فائنل کیلئے کوالیفائی کیا۔
پاکستان اور بھارت کے درمیان فائنل کا معرکہ برمنگھم کے ایجبیسٹون کرکٹ گراؤنڈ میں شام 7 بجے شروع ہوگا۔
بھارت پاکستان کے بغیر ہونے والے بلائنڈ ٹی ٹوئنٹی ورلڈ کپ کا دفاعی چیمپئن بھی ہے۔ تاہم برمنگھم میں جاری بلائنڈ گیمز کرکٹ کے راؤنڈ میچز کے دوران پاکستانی ٹیم نے بھارت کو شکست دی تھی۔
یاد رہے کہ پاکستان ٹیم ورلڈ بلائنڈ گیمزکے کرکٹ کے مقابلوں میں تمام 4 راؤنڈ میچز جیت کر پوائنٹس ٹیبل پر پہلے نمبر پر رہا اور پول اسٹیج میں پہلی پوزیشن حاصل کرکے ڈائریکٹ فائنل میں جگہ بنا لی تھی۔
پاکستان نے راؤنڈ میچز کے دوران بھارت، بنگلادیش، سری لنکا اور انگلینڈ کی ٹیموں کو شکست دی تھی۔