ایک نیوز: پارٹی ذرائع کا کہنا ہے کہ پاکستان مسلم لیگ ن کی سینئر نائب صدر اور چیف آرگنائزر مریم نواز کی عمرہ ادائیگی کے بعد وطن واپسی آج ہو گی۔
پارٹی ذرائع کا کہنا ہے کہ مریم نواز آج رات کو سعودی عرب سے پاکستان واپس پہنچیں گی،مریم نواز غیرملکی ایئرلائن کی پرواز کے ذریعے جدہ سے لاہور کے علامہ اقبال انٹرنیشنل ایئرپورٹ پہنچیں گی،مریم نواز غیرملکی ایئرلائن(سعودی ایئرلائن) کی پرواز ایس وی 738 کے ذریعے رات 12 بج کر 50 منٹ پر لاہور پہنچیں گی۔
پارٹی ذرائع کاکہنا ہے کہ مریم نواز کے ہمراہ ان کے دیگر اہلخانہ بھی وطن واپس پہنچیں گے،مریم نواز 11 اور 12 اپریل کی درمیانی رات کو لاہور سے جدہ روانہ ہوئی تھیں،مریم نواز نے رمضان المبارک کا آخری عشرہ اپنے والد نواز شریف و دیگر اہلخانہ کے ہمراہ حریمین شریفین میں گزارا،مریم نواز اور نواز شریف سعودی عرب میں شاہی خاندان کے خصوصی مہمان تھے،نواز شریف اور مریم نواز نے سعودی شاہی قیادت سے ملاقاتیں بھی کیں۔
پارٹی ذرائع کا مزید کہنا ہے کہ مریم نواز کے والد نواز شریف جدہ سے لندن کے لئے روانہ ہو چکے ہیں،مریم نواز کل سے ہی اپنی سیاسی مصروفیات کا آغاز کریں گی۔