ایک نیوز : سی-295 فوجی طیارہ بھارتی فضائیہ میں شامل کر لیا گیا۔ ہنڈون ائیر بیس غازی آباد پر ہونے والی تقریب میں بھارتی وزیر دفاع راج ناتھ سنگھ کی بطور مہمان خصوصی شرکت، اسپین اور بھارتی کمپنی کے حکام بھی شریک تھے۔
رپورٹ کے مطابق اس طرح کے کل 16 طیارے اسپین کی طرف سے فراہم کیے جائیں گے، جبکہ بقیہ 40 کو میک ان انڈیا پالیسی کے تحت وڈودرا، گجرات میں تیار کیا جائے گا۔
یادرہے سی-295 ایک ٹرانسپورٹ ائیرکرافٹ طیارہ ہے، جو مختصر وقت میں ٹیک آف اور لینڈ کرنے کی صلاحیت رکھتا ہے۔
سی 295 طیارے بھارتی فضائیہ کے پرانے ایورو-748 طیاروں کی جگہ لیں گے ۔
بھارت نے 56 سی-295 طیارے خریدنے کے لیے ایئر بس ڈیفنس اینڈ اسپیس کے ساتھ 21,000 کروڑ روپے سے زیادہ کے ایک معاہدے پر دستخط کیے تھے معاہدے کے تحت، ایئربس پہلے 16 طیارے 'فلائی وے' حالت میں اسپین سے ہندوستان کو چار سال کے اندر فراہم کرے گا اور 40 طیارے ہندوستان میں ٹاٹا ایڈوانسڈ سسٹمز (TASL) کے ذریعہ دونوں کمپنیوں کے درمیان صنعتی شراکت داری کے طور پر تیار اور اسمبل کیے جائیں گے۔
سی 295 طیارہ زیادہ سے زیادہ 260 کلومیٹر کی رفتار سے نو ٹن تک پے لوڈ یا 71 فوجیوں کو لے جانے کی صلاحیت رکھتا ہے۔
سی295 30,000 فٹ کی بلندی پر پرواز کر سکتا ہے یہ طیارہ فضائیہ کی ضرورت کے مطابق مختصر رن وے پر بھی لینڈ یا ٹیک آف کر سکتا ہے۔ یہ تقریباً 480 کلومیٹر فی گھنٹہ کی رفتار سے 11 گھنٹے تک مسلسل پرواز کر سکتا ہے۔ اسے ٹیک آف کے لیے 670 میٹر اور لینڈنگ کے لیے صرف 320 میٹر کا رن وے درکار ہوگا۔ اس طیارے کو ملٹری کے ساتھ ساتھ سول اور انسانی مشنز کے لیے بھی استعمال کیا جا سکتا ہے۔