ٹویوٹاگاڑیوں کی قیمتوں میں بڑااضافہ،یارس’فیس لفٹ ‘کتنےکی ہوگئی؟

ویب ڈیسک: انڈس موٹر کمپنی (آئی ایم سی) نے ٹویوٹا یارس فیس لفٹ ماڈل متعارف کردیا، جبکہ ان کی قیمتوں میں ایک لاکھ 44 ہزار روپے سے 6 لاکھ 6 ہزار روپے تک کا اضافہ کیا گیا ہے۔
تفصیلات کےمطابق رپورٹ میں بتایاگیاکہ رواں سال مارچ کے وسط میں انڈس موٹرز نے یارس کے مختلف ماڈلز کی قیمتوں میں 73 ہزار روپے سے ایک لاکھ 33 ہزار روپے تک کمی کی تھی، تاکہ ان کی قیمتوں کو 40 لاکھ روپے سے کم پر رکھا جاسکے، جس میں جنرل سیلز ٹیکس شامل نہیں۔
آئی ایم سی کی جانب سے مجاز ڈیلرز کو جاری لسٹ میں عندیہ دیا گیا کہ ٹویوٹا یارس جی ایل آئی ایم / ٹی 1.3، سی وی ٹی 1.3، اے ٹی آئی وی ایم/ٹی 1.3 اور اے ٹی آئی وی سی وی ٹی 1.3 کی قیمتیں بڑھا کر بالترتیب 44 لاکھ 79 ہزار روپے، 47 لاکھ 60 ہزار روپے، 47 لاکھ 30 ہزار روپے اور 56 لاکھ 4 ہزار روپے ہوں گی، جو اس سے قبل 43 لاکھ 26 ہزار، 46 لاکھ 16 ہزار، 45 لاکھ 86 ہزار اور 47 لاکھ 66 ہزار روپے میں دستیاب تھیں۔
اے ٹی آئی وی ایکس سی وی ٹی 1.5 (بیج انٹیرئیر) کی قیمت 56 لاکھ 49 ہزار روپے سے بڑھا کر 62 لاکھ 55 ہزار روپے کر دی گئی ہے۔
یارس کی بکنگ 15 لاکھ روپے ادا کر کے کرائی جاسکے گی۔
مالی سال 2024 کے ابتدائی 10 ماہ کے دوران گاڑیوں کی فروخت سست روی کا شکار رہی، تاہم اسٹیٹ بینک آف پاکستان کی جانب سے درآمد پر پابندوں میں نرمی کے بعد سی کے ڈی کی درآمد بڑھی، جس سے امید کی کرن روشن ہوئی۔