عمران خان کی جان کو خطرہ ہے تو منصورہ آکر رہیں ، سراج الحق 

 ایک نیوز :جماعت اسلامی کے امیر سراج الحق نے چیئرمین تحریک انصاف عمران خان کو جماعت اسلامی کے ہیڈ کوارٹرمنصورہ میں قیام کی دعوت دے دی۔
تفصیلات کےمطابق جماعت اسلامی کے امیر سراج الحق نے منصورہ لاہور میں پریس کانفرنس کرتے ہوئے کہا کہ عمران خان یا جس بھی سیاستدان کو جان کا خطرہ ہے وہ منصورہ آ جائے،الیکشن کمیشن نے ملک کو آئینی بحران میں مبتلا کردیا۔ الیکشن کے حوالے سے سپریم کورٹ کا حکم نہ مانا تو یہ آئین سے بغاوت ہوگی۔
ان کا کہناتھا کہ پی ڈی ایم اور  پی ٹی آئی ہوش کے ناخن لیں ورنہ مارشل لاء کی طرف بڑھ رہے ہیں، قومی اسمبلی ، سندھ اور  بلوچستان اسمبلیاں توڑ کر ایک ہی دن انتخابات کرائے جائیں۔انہوں نے کہا کہ مینارِ پاکستان پر عمران خان کے جلسے کی راہ میں رکاوٹیں کھڑی نہ کی جائیں، ملک میں موت سستی اور آٹا مہنگا ہوگیا، ایک لاکھ 40 ہزار  افراد ڈپریشن کے مریض بن چکے ہیں۔