فواد چودھری کی گرفتاری،اسلام آباد پولیس کابیان سامنے آ گیا

فواد چودھری کی گرفتاری،اسلام آباد پولیس کابیان سامنے آ گیا
کیپشن: فواد چودھری کی گرفتاری،اسلام آباد پولیس کابیان سامنے آ گیا

ایک نیوز: پاکستان تحریک انصاف کے رہنما فواد چودھری کی گرفتاری پر اسلام آباد پولیس کا بیان سامنے آ گیا ہے۔

تفصیلات کے مطابق فواد چودھری کو رات گئے ٹھوکر نیاز بیگ سے گرفتار کیا گیا تھا اور اطلاعات ہیں کہ اسلام آباد پولیس انہیں گرفتار کر کے اپنے ساتھ وفاقی دارالحکومت لے گئی ہے۔

اب اس حوالے سے اسلام آباد پولیس کا بیان سامنے آیا ہے جس میں فواد چودھری کی گرفتاری کی تصدیق کی گئی ہے۔

اسلام آباد پولیس نے سوشل میڈیا پر جاری بیان میں بتایا کہ فواد چوہدری کے خلاف مقدمہ کارروائی سیکرٹری الیکشن کمیشن عمر حمید کی درخواست پر کی گئی۔

پولیس کے مطابق سیکرٹری الیکشن کمیشن آف پاکستان کی درخواست پر تھانہ کوہسار میں درج کیا گیا۔

وفاقی دارالحکومت کی پولیس نے مزید بتایا کہ فواد چودھری نے آئینی اداروں کے خلاف شر انگیزی پیدا کرنے اور لوگوں کے جذبات مشتعل کرنے کی کوشش کی ہے، مقدمے پر قانون کے مطابق کارروائی عمل میں لائی جا رہی ہے۔

ایف آئی آر کے مطابق فواد چودھری نے کہا تھا کہ الیکشن کمیشن کی حیثیت ایک منشی کی ہو گئی ہے، جو لوگ نگران حکومت میں لگ رہے ہیں ان کا سزا ہونے تک پیچھا کریں گے،حکومت میں شامل لوگوں کو ان کے گھروں تک چھوڑ کر آئیں گے۔فواد چودھری نے الیکشن کمیشن، ان کے ممبران اور ان کے خاندانوں کو بھی خبردار کیا تھا۔

فواد چودھری کیخلاف درج مقدمے میں کار سرکار اور دھمکی دینے کی دفعات شامل ہیں، مقدمے میں 153اے ،124اے ،505 اور506 کی دفعات کو بھی شامل کیا گیا ہے۔

پولیس ذرائع کا بتانا ہے کہ فواد چودھری کو اسلام آباد منتقل کرنے پر جوڈیشل مجسٹریٹ کی عدالت میں پیش کیا جائے گا اور اسلام آباد پولیس فواد چودھری کا جسمانی ریمانڈ حاصل کرنے کی استدعا کرے گی۔

شیئر کریں:

JAWAD MALIK