ایک نیوز:آئی سی سی کرکٹ ورلڈ کپ 2023 کیلئے پاکستان کرکٹ ٹیم کو تا حال ویزے جاری نہیں ہوسکے۔
رپورٹ کے مطابق قومی کرکٹ ٹیم کی بھارت روانگی میں دو دن باقی رہ گئے ہیں لیکن کھلاڑیوں کو ویزے جاری نہیں ہوسکے ہیں۔پاکستان کرکٹ بورڈ نے آئی سی سی کو تمام تر مشکلات اور پریشان کُن صورتحال سے آگاہ کردیا ہے۔ قومی اسکواڈ 26 ستمبر کو براستہ دبئی بھارت جائے گا،پاکستانی شائقین بھی ویزہ پالیسی کے منتظر ہیں۔
قومی ٹیم کا 15 رکنی اسکواڈ
کپتان بابر اعظم، امام الحق، فخر زمان، عبداللہ شفیق، وکٹ کیپر محمد رضوان، سلمان علی آغا، افتخار احمد، سعود شکیل، شاداب خان، محمد نواز، اسامہ میر، محمد وسیم جونیئر، شاہین شاہ آفریدی، حارث روف اور حسن علی۔محمد حارث، زمان خان اور ابرار احمد ریزرو کھلاڑیوں میں شامل ہیں۔
ورلڈ کپ کا آغاز
یاد رہے کہ ورلڈ کپ 5 اکتوبر سے 19 نومبر تک بھارت میں کھیلا جائے گا۔ ورلڈ کپ سے قبل پاکستانی ٹیم 29 ستمبر کو نیوزی لینڈ اور 3 اکتوبر کو آسٹریلیا کے خلاف دو وارم اَپ میچز کھیلے گی۔ ورلڈ کپ میں اپنا پہلا میچ 6اکتوبر کو نیدر لینڈ کے خلاف کھیلے گی۔پاکستانی ٹیم 2019 کے عالمی کپ میں نیوزی لینڈ سے کم رن ریٹ کی وجہ سے سیمی فائنل میں نہیں پہنچ سکی تھی جو ورلڈ کپ کی رنرز اَپ رہی تھی۔
پاکستان نے 1992 میں ورلڈ کپ جیتا ہے جبکہ 1999 میں اس نے فائنل کھیلا تھا۔ اس کے علاوہ پاکستان چار مرتبہ 1979، 1983، 1987 اور 2011 میں سیمی فائنل بھی کھیل چکا ہے۔