ایک نیوز نیوز: دفتر خارجہ نے ارشد شریف کی ناگہانی موت پر اظہار تعزیت کرتے ہوئے کہا ہے پاکستانی ہائی کمیشن میت کی جلد وطن واپسی میں سہولت فراہم کریگا۔
تفصیلات کے مطابق پاکستان کے سینیئر صحافی اور نامور اینکر ارشد شریف کی شہادت پر دفتر خارجہ کے جاری تعزیتی بیان میں کہا گیا ہے کہ پاکستانی ہائی کمشنر کو 24 اکتوبر کی صبح ارشد شریف کی موت کی ابتدائی اطلاع ملی، جس کے بعد ہائی کمشنر نے کینیا پولیس حکام، وزارت خارجہ سمیت دیگر محکموں سے رابطہ کیا جب کہ ہائی کمیشن کی جانب سے کینیا کے نائب صدر سے بھی رابطہ کیا گیا.
ترجمان کے مطابق واقعے کی اطلاع ملنے کے بعد ہائی کمیشن مشن کے لوگ موقع پر پہنچے اور واقعے کے حوالے سے معلومات حاصل کیں، ہائی کمیشن نے ارشد شریف کی لاش کی شناخت کی جب کہ قائم مقام سیکریٹری خارجہ نے ارشد شریف کے اہلخانہ سے ملاقات بھی کی ہے۔
ترجمان کا کہنا ہے کہ پولیس رپورٹ میں مزید کارروائی کا انتظار ہے، کینیا میں پاکستانی ہائی کمشنر سیدہ ثقلین کینیا کے حکام کے ساتھ ہیں اور انہوں نے مرحوم کی میت کی حوالگی اور شناخت کیلئے ہسپتال کا دورہ بھی کیا ہے۔
واضح رہے کہ اتوار کی رات گئے پاکستان کے سینیئر صحافی اور نامور اینکر ارشد شریف کینیا کے شہر نیروبی کے قریب گولی لگنے کے واقعے میں شہید ہوگئے تھے۔
بعد ازاں کینیا میڈیا نے رپورٹ کیا کہ ارشد شریف مقامی پولیس کی گولی کا نشانہ بنانے، پولیس نے بھی اس حوالے سے تصدیق کرتے ہوئے کہا کہ واقعہ غلط فہمی کی بنا پر پیش آیا۔