ایک نیوز: آئی ایس پی آر کے مطابق رومانیہ کی بحری افواج کے سربراہ نے پاکستان بحریہ کے نئے جنگی جہاز پی این ایس یمامہ کا دورہ کیا ہے۔
پاک فوج کے شعبہ تعلقات عامہ (آئی ایس پی آ ر ) کے مطابق وائس ایڈمرل میہائی پنائیت کو جہاز کی آپریشنل صلاحیتوں پر تفصیلی بریفنگ دی گئی ۔
قبل ازیں وائس ایڈمرل محمد فیصل عباسی اور رومانیہ کی نیول فورسز کے سربراہ کے درمیان ملاقات ہوئی، دونوں کمانڈرز نے بحری افواج کے مابین بڑھتے ہوئے تعلقات پر اطمینان اور تعاون کو مزیدمستحکم کرنے کے عزم کا اظہار کیا ۔
آئی ایس پی آر کے مطابق 17 دسمبر کو کمیشن ہونے والے پی این ایس یمامہ نے رومانیہ کے بحری جہاز کے ساتھ اپنی پہلی بحری مشق کا بھی انعقاد کیا ،مشق کا مقصد دونوں بحری افواج کے مابین مشترکہ آپریشنز کی صلاحیت کو فروغ دینا تھا ۔
آئی ایس پی آر کا کہنا ہے کہ پی این ایس یمامہ پاک بحریہ کے ان چار جہازوں میں سے آخری جہاز ہے جو ڈیمین شپ یارڈز میں تعمیر کیے گئے ،اس سے قبل پاک بحریہ نے تین آف شور پٹرول ویسلز پی این ایس تبوک، پی این ایس یرموک اور پی این ایس حنین اپنے بیڑے میں شامل کیے۔