وزیراعظم نے جناح ایونیو انٹرچینج انڈر پاس کا افتتاح کر دیا

 ایک  نیوز: وزیراعظم  محمد شہباز شریف نے اسلام آباد میں جناح ایونیو انٹرچینج انڈر پاس کا افتتاح کر دیا  ہے۔  
تفصیلات کے مطابق اسلام آباد میں جناح ایونیو انٹرچینج انڈرپاس کی افتتاحی تقریب ہوئی، وزیراعظم، وزیرداخلہ محسن نقوی، وزیراطلاعات عطاتارڑ سمیت دیگر وزرا کے ساتھ تقریب میں شریک ہوئے۔
کیپٹیل ڈیولپمنٹ اتھارٹی (سی ڈی اے) کے چیئرمین نے وزیر اعظم کو جناح ایونیو انٹرچینج کے حوالے سے بریفنگ دی جس میں بتایا گیا کہ جناح ایونیو انٹرچینج منصوبے میں سیفٹی اور  سکیورٹی کو یقینی بنایا گیا۔
اس میں بتایا گیا کہ جناح ایونیو انٹرچینج منصوبے کے پہلے مرحلے میں 950 میٹر انڈر پاس مکمل کیا گیا، جناح ایونیو انٹرچینج منصوبے میں سیفٹی اور سکیورٹی کو یقینی بنایا گیا۔
افتتاحی تقریب سے خطاب کرتے ہوئے وزیر اعظم  محمد شہباز شریف کا کہنا تھا کہ آج سے 42 دن پہلے اس منصوبے کا سنگ بنیاد رکھا گیا تھا، 42 دن کی ریکارڈ مدت میں منصوبے کو مکمل کیا گیا، دن رات کام کرنے سے ہی قومیں ترقی کرتی ہیں، چیئرمین سی ڈی اے، ان کی ٹیم اور کنٹریکٹرز کو بھی مبارکباد پیش کرتا ہوں۔
وزیراعطم نے کہا کہ فلائی اوور مکمل ہونے سے اسلام آباد اور راولپنڈی کے ٹریفک مسائل حل ہوں گے، سرینا چوک منصوبے پر بھی کام ہورہا ہے، یقین ہے اسی برق رفتاری سے سرینا چوک منصوبہ بھی مکمل ہوگا، اسلام آباد ٹریفک پولیس نے تعمیر کے دوران ٹریفک کا ماحول برقراررکھا۔
شہباز شریف کا مزید کہنا تھا کہ محسن نقوی اور ٹیم نے دن رات محنت کی، محسن نقوی راتوں کو بھی منصوبے کا دورہ کر کے کام کا جائزہ لیتے رہے، انشا اللہ اسی رفتار سے ترقی کا سفر جاری رہے گا، پاکستان کی ترقی اور خوشحالی آگے لے کر جائیں گے۔