ویب ڈیسک:لاہور میں خیبرپختونخوا کے وزیراعلیٰ علی امین گنڈا پور کے خلاف مقدمہ درج کرلیا گیا۔
پولیس نے علی امین گنڈا پور کے خلاف لاہور کے تھانے تھانا مناواں میں مقدمہ درج کیا جس میں انسداد دہشتگردی ایکٹ، اقدام قتل سمیت 13 دفعات لگائی گئی ہیں۔
مقدمے کے متن کے مطابق سیالکوٹ انٹرچینج پر علی امین اسلحہ سے لیس ایک جتھے کی قیادت کررہےتھے، ان کے کہنے پر ٹال پلازہ پرکھڑی گاڑیوں کو آگ لگانے کی کوشش کی گئی اور مسلح جھتے نے اے کے 47 کے ذریعے پولیس مزاحمت بھی کی۔
ایف آئی آر میں کہا گیا ہے کہ علی امین گنڈا پور اور شاہد خٹک سمیت دیگربلوا کرتے ہوئے آگے نکل گئے، علی امین کے ساتھ آنے والے لوگوں نے2 پولیس والوں کو بھی زخمی کیا اور ان کے کہنے پر ٹال پلازہ پر گاڑیوں کے شیشے توڑے گئے۔
خیال رہے کہ 21 ستمبر کو لاہور میں خیبرپختونخوا کے وزیراعلیٰ علی امین گنڈا پور جلسہ ختم ہونے کے بعد جلسہ گاہ پہنچے تھے۔
وہاں موجود کارکن انہیں دیکھ کر جوش میں آ گئے تھے، علی امین گاڑی سے باہر نکلے ہاتھ ہلا کر ان کے نعروں کا جواب دیا اور کارکنوں سے گفتگو بھی کی پھر روانہ ہوئے۔
اس سے قبل وہ فیروزوالا پہنچ کر رکاوٹ کیلئے کھڑی گاڑی کو دیکھ کر طیش میں آ گئے تھے، اپنی گن سے گاڑی کا شیشہ توڑا تھا۔