زمین سے 20سے30گنابڑاہول سورج میں دریافت

ایک نیوز:زمین سے 20سے30گنابڑاہول سورج میں دریافت ہوگیا۔ ناسا نے سورج میں ایک ایسے بہت بڑے سیاہ خطے کو دیکھا ہے جس کیلئے کورونل ہول کی اصطلاح استعمال کی جاتی ہے۔
تفصیلات کےمطابق یہ سورج کی سطح پر کوئی گڑھا یا سوراخ نہیں بلکہ یہ وہ خطہ ہے جہاں کا درجہ حرارت اس ستارے کے دیگر حصوں کے مقابلے میں کم ہوتا ہے۔
اس وجہ سے یہ حصہ سورج کے دیگر خطوں جتنا روشن نہیں ہوتا اور سیاہ نظر آتا ہے۔
ماہرین کاکہناہے کہ اس طرح کے کورونل ہولز غیر معمولی نہیں بلکہ کافی عام ہوتے ہیں۔اس طرح کے خطے سورج کی معمول کی سرگرمیوں کا حصہ ہیں مگر ماہرین کے مطابق ان کے بارے میں ابھی کافی کچھ معلوم نہیں ہو سکا ہے۔
ناسا سے تعلق رکھنے والے ایلکس ینگ کاکہناہے کہ کورونل ہول سے برق رفتار شمسی ہوائیں خارج ہوتی ہیں جن کی رفتار 500 سے 800 کلومیٹر فی سیکنڈ ہوتی ہے۔
سورج کے اس نئے کورونل ہول سے خارج ہونے والی ہوائیں زمین پر اس ہفتے کے آخر تک پہنچیں گی۔ ممکنہ طور پر ہم اس کا اثر 24 مارچ تک دیکھیں گے۔
اس طرح کی شمسی ہواؤں سے بجلی کا نظام متاثر ہونے کا امکان ہوتا ہے مگر ماہرین کے مطابق اس نئی لہر کا اثر قطبی روشنیوں کی شکل میں نظر آئے گا۔
ایلکس ینگ کامزیدکہناہے کہ آنے والے برسوں میں اس طرح کی شمسی لہریں زیادہ عام ہو جائیں گی اور ان لہروں کے مقناطیسی میدان بجلی کے نظام اور سیٹلائیٹس پر اثر انداز ہو سکتے ہیں۔