ایک نیوز: تحریک انصاف نے وفاقی حکومت کی مذاکراتی کمیٹی سے مزید مذاکرات نہ کرنے کا اعلان کردیا،پی ٹی آئی کی وفاقی حکومت سے اچانک مذاکراتی سلسلہ ختم کرنے کی اندرونی کہانی سامنے آگئی ہے۔
ذرائع کے مطابق رات گئے بیرسٹر گوہر علی کی صدارت پارٹی کا اہم ویڈیو لنک اجلاس منعقد ہوا ، اجلاس میں موجودہ سیاسی صورتحال پر تفصیلی گفتگو کی گئی ، وزیراعلی خیبر پختونخواہ علی امین گنڈاپور بھی شریک تھے ۔
اجلاس میں وفاقی حکومت کی مذاکراتی کمیٹی کی جانب سے جوڈیشل کمیشن کے قیام کا نوٹیفکیشن جاری نہ ہونے پر گفتگو کی گئی ، بیرسٹر گوہر علی اور سلمان اکرم راجہ نے مزید ایک سے دو روز انتظار کرنے کی تجویز دی ، علی امین گنڈاپور نے مقررہ وقت تک جوڈیشل کمیشن کے قیام کا لیٹر جاری نہ کرنے پر مذاکرات ختم کرنے پر زور دیا ، وزیراعلیٰ کے پی کے نے بانی تحریک انصاف سے آخری کی جانے والی ملاقات کے حوالے دیئے ۔
ذرائع نے بتایا کہ تحریک انصاف اسد قیصر اور علی امین گنڈاپور مذاکرات ختم کرنے کے حوالے سے ایک پیج پر رہے ، حامد رضا نے بھی علی امین گنڈاپور تجویز کی تائید کی، ویڈیو لنک اجلاس میں حکومتی ذرائع کا بھی ذکر ہوتا رہا اور کہا گیا کہ حکومت جوڈیشل کمیشن کسی صورت نہیں بنائے گی ، بیرسٹر گوہر علی نے معاملہ آج بانی تحریک انصاف کے سامنے رکھنے کی تجویز دی ، علی امین گنڈاپور نے اجلاس میں پیشگی کہا کہ بانی تحریک انصاف بھی مذاکراتی سلسلے کو ختم کرنے کا کہیں گے ۔
ذرائع نے مزید بتایاکہ بیرسٹر گوہر علی نے بانی تحریک انصاف سے ملاقات کی دوران رات گئے اجلاس اور موجودہ صورتحال سے آگاہ کیا ، بانی نے مذاکراتی سلسلے کو ختم کرنے اور فوری اعلان کرنے کی ہدایات جاری کیں ، ملاقات کے بعد بیرسٹر گوہر علی نے مذاکراتی کمیٹی بنائے گئے واٹس ایپ گروپ میں صورتحال سامنے رکھی جس پر سب نے فوری اعلان کرنے کا کہا ہے۔