شائقین کی توقعات پوری کرنے کیلئے بے چین ہیں،شاہین آفریدی

ایک نیوز : پاکستان کرکٹ ٹیم کے فاسٹ بولر شاہین شاہ آفریدی کا کہنا ہے کہ ہم شائقین کی توقعات پوری کرنے کے لیے بے چین ہیں۔
 شاہین شاہ آفریدی کا پریس کانفرنس کرتے ہوئے کہنا تھاکہ  آئی سی سی ون ڈے ورلڈکپ میں پاکستان کل افغانستان کے خلاف اپنا پانچواں میچ ایم اے چدمبرن اسٹیڈیم میں کھیلے گا، اس سے قبل پاکستان چار میچز میں دو میں فتح اور دو میں شکست حاصل کرچکا ہے۔
فاسٹ بولر شاہین آفریدی اس بات پر یقین رکھتے ہیں کہ آخری دو میچوں سے ٹیم نے جو کچھ سیکھا ہے وہ اگلے میچوں میں مددگار ثابت ہوگا۔
شاہین آفریدی  کا مزید کہنا تھاکہ شکست ، شکست ہوتی ہے اور ہمیں اسے تسلیم کرنا چاہیے لیکن ٹیم کے لیے بہتر ہوگا کہ ہم اس سے سیکھیں۔آنے والے دو میچز ہمارے لیے بہت اہم ہیں ، ہم ابھی ٹورنامنٹ میں موجود ہیں ، ہم ورلڈکپ جیت کر تاریخ بنانے کے لیے یہاں موجود ہیں۔
شاہین آفریدی نے کہا کہ ورلڈ کپ جیسے ٹورنامنٹ میں کوئی بھی ٹیم کسی کو بھی ہراسکتی ہے لہذا آپ کسی طور بھی اطمینان سے نہیں بیٹھ سکتے ، افغانستان کی ٹیم اچھا کھیل رہی ہے اور اس نے انگلینڈ کو ہرایا ہے۔ ہمیں اس کے خلاف اپنی بہترین مہارت دکھانی ہوگی۔ان کے پاس ورلڈ کلاس اسپنرز ہیں تاہم ہماری بیٹنگ بھی اچھا کررہی ہے۔