کراچی میں بارش ہونے پر سوشل میڈیا صارفین خوش

کراچی میں بارش ہونے پر سوشل میڈیا صارفین خوش
ایک نیوز نیوز:صوبہ سندھ کے دارالحکومت کراچی میں 22 جون کی شام کو بارش ہونے کے بعد جہاں گرمی کا زور ٹوٹ گیا، وہیں موسم بھی خوشگوار ہوگیا۔

کراچی میں 22 جون کو بارش کا آغاز سہ پہر کے بعد ہی شروع ہوگیا تھا، تاہم ملک کے سب سے بڑے شہر کے درجنوں علاقوں میں رات 8 بجے تک بارش نہ ہوسکی تھی۔
کراچی کے کھلے علاقوں جیسے ملیر، گلشن حدید، گلشن معمار، گڈاپ ٹاؤن، لیاری، کورنگی اور منگھوپیر کے علاقوں میں سہ پہر کے بعد بارش ہونا شروع ہوئی اور وہاں وقفے وقفے سے رات تک بارش ہوتی رہی۔



کھلے علاقوں کے بعد گلشن اقبال، کلفٹن، آئی آئی چندریگر روڈ، صدر، شاہراہ فیصل، گلستان جوہر اور گارڈن سمیت دیگر علاقوں میں بھی شام کے بعد بارش ہونا شروع ہوئی اور سوشل میڈیا صارفین کے مطابق متعدد علاقوں میں پہلی بار زوردار بارش ہوئی۔



شہر قائد میں تیز بارش ہونے کے بعد موسم خوشگوار بننے اور گرمی کا زور ٹوٹنے کے بعد سوشل میڈیا صارفین نے خوشی کا اظہار کیا اور شکرانے ادا کیے کہ سخت گرمی سے نجات ملی۔



زیادہ تر افراد نے شہر میں بارش کی اطلاع دی اور کچھ لوگوں نے بارش ہوتے ہی بجلی چلے جانے کی شکایت بھی کی۔



بارش ہونے پر جہاں کراچی والوں نے خوشی کا اظہار کیا، وہیں ملک کے دوسرے شہروں میں رہنے والے افراد نے بھی سندھ کے دارالحکومت میں رہنے والے اپنے دوستوں کو بارش کی مبارک باد پیش کی۔



دوسرے شہروں میں رہنے والے لوگوں نے کراچی میں مقیم اپنے دوستوں کے سوشل میڈیا اسٹیٹس کے اسکرین شاٹ لے کر ان پر میمز بناکر بھی کراچی والوں کو بارش کی مبارک باد دی۔



زیادہ تر صارفین کی جانب سے شیئر کی گئی ویڈیوز میں تیز ہوا کے ساتھ بارش میں بچوں کو کھیلتے ہوئے دیکھا گیا۔



بعض لوگوں نے شہر میں مون سون کی پہلی بارش ہونے پر بھی خوشی کا اظہار کیا۔


شیئر کریں:

Waleed shahzad