ایک نیوز: رہنما مسلم لیگ ن طلال چودھری نے کہا ہے پاکستان تحریک انصاف بانی پی ٹی آئی کی چوری چھپانے کیلئے مذہب کارڈ استعمال کررہی ہے ۔
تفصیلات کے مطابق اسلام آباد میں میڈیا سے گفتگو کرتے ہوئے سینیٹر طلال چودھری نے کہا 90ملین پاؤنڈ اوپن اینڈ شٹ کیس ہے ، 190ملین پاؤنڈ کی بند لفافے میں کابینہ سے منظوری کی گئی،جھوٹ بولنا تحریک انصاف کا وطیرہ ہے،بانی پی ٹی آئی نے سیاسی مخالفین کے خلاف گڑھا کھودا، بانی پی ٹی آئی مخالفین کیخلاف کھودے گئے گڑھے میں خود گر گئے، پی ٹی آئی دور میں سیاسی مخالفین کو انتقام کا نشانہ بنایا گیا، ہماری قیادت نے پی ٹی آئی دور میں جھوٹے مقدمات کا سامنا کیا، مسلم لیگ ن کی قیادت مقدمات کا سامنا کر کے سرخرو ہوئی،این سی اے نے ہماری قیادت کو کلین چٹ دی۔
انہوں نے کہا بانی پی ٹی آئی میگا کرپشن کیس میں رنگے ہاتھوں پکڑے گئے ہیں، معاملے میں شہزاد اکبر کی لندن میں پراپرٹی ٹائیکون کیساتھ ویڈیو بنی، دال میں کالا نہیں تھا تو 190ملین پاؤنڈ کوکابینہ سے کیوں چھپایا گیا؟ کہتے ہیں ٹرسٹ بنایا،سیاست میں بھی اسلامی ٹچ، بانی کی چوری چھپانے کے لئے پی ٹی آئی مذہب کا استعمال کر رہی ہے، چوری چھپانے کے لئے القادر ٹرسٹ کا سہارا لیا گیا، القادر ٹرسٹ کے ٹرسٹی بانی پی ٹی آئی اور ان کی اہلیہ ہیں۔