ویب ڈیسک :چیئرمین سینیٹ صادق سنجرانی نے ا یوان بالا کی گولڈن جوبلی کے سلسلے میں پارلیمنٹ ہاؤس میں دیوار وفاق کا افتتاح کردیا۔
چیئرمین سینیٹ صادق سنجرانی کاکہنا تھا کہ دیوار وفاق پر تصویری مجمو عہ ایوان بالاءکے 50 سالہ تاریخی سفر کی عکاسی کی گئی ہے ۔ یہ تصاویر سینیٹ کا قیمتی اثاثہ ہیں اور ہمارے جمہوری اداروں کی اہمیت کی یاد دہانی کا کام کرتی ہیں۔دیوار وفاق پر موجود تصاویر سینیٹ کی تاریخ کی اہم جھلک پیش کرتی ہیں ۔دیوار وفاق پر موجود تصاویر سینیٹ میں تاریخی واقعات کی نمائندگی کرتی ہیں، اہم قانون سازی کی منظوری اور ممتاز قومی اور بین الاقوامی معززین کے دورے شامل ہیں ۔ایوان بالاءکا دورہ کرنے والے افراد کو ایوان بالاءکی تاریخ کی آگاہی کے لئے ایک اعلیٰ قسم کا میوزیم بھی قائم کیا گیا ہے ۔
صادق سنجرانی کا کہنا تھا کہ پاکستان اور قوم کی ترقی و خوشحالی کے لئے ہم سب ساتھ ہیں ۔ ایوان بالا وفاقی اکائیوں کی مساوی نمائندگی کے لئے وجود میں آیا ۔ تصاویر سینیٹ کے میڈیا ڈائریکٹوریٹ نے پریس انفارمیشن ڈیپارٹمنٹ کے تعاون سے اکٹھی کی ہیں۔ ڈائریکٹر جنرل کو آرڈینشن کی زیر نگرانی منصوبے پر کام شروع ہوا اور پایہ تکمیل تک پہنچا۔
چیئرمین سینیٹ نے متعلقہ شعبوں کی اس حوالے سے کاوش کو سراہا جنہوں نے دیوار وفاق کے منصوبہ پر کام کیا ۔
دیوار وفاق کی افتتاحی تقریب کے موقع پر چیئرمین سینیٹ محمد صادق سنجرانی کے ہمراہ سینیٹرز عبدالقادر ، پروفیسر ساجد میر، عرفان صدیقی، ڈاکٹر زرقہ سہروردی تیمور، طاہر بزنجو، بہرہ مند خان تنگی اور سیکرٹری سینیٹ محمد قاسم صمد خان کے علاوہ ایوان بالا کے اعلی حکام بھی موجود تھے۔
چیئرمین سینیٹ نے ایوان بالا کے زیر سرپرستی بلاک سی کی اپ گریڈیشن کے بعد دفاتر کا باقاعدہ افتتاح کر دیا۔
صادق سنجرانی کا کہنا تھا کہ اپ گریڈیشن کا مقصد اراکین سینیٹ اور ملازمین کو بہتر کام کا ماحول فراہم کرنا ہے۔ اپ گریڈیشن سے ملازمین کے استعداد کار اور کارکردگی بہتر بنانے میں مدد ملے گی۔