امریکہ کی جانب سے غزہ کی قرارداد کو ناکام بنانے پر حماس کا ردعمل

ویب ڈیسک:حماس نے غزہ جنگ بندی کی قرارداد کو ناکام بنانے پر امریکا کی شدید الفاظ میں مذمت  کی۔
 حماس نے اقوام متحدہ کی سلامتی کونسل میں غزہ جنگ بندی کی قرارداد ناکام بنانے کا ذمہ دار امریکی صدر جوبائیڈن کو ٹھہرایا ہے۔
حماس کی جانب سے جاری بیان میں کہا گیا ہے کہ قرارداد کو ویٹو کرکے امریکا نے فلسطینیوں کا قتلِ عام کرنے کے لیے اسرائیل کو گرین سگنل دیا ہے۔
بیان میں صیہونی ریاست کا بہادری سے مقابلہ کرنے کے عزم کا اظہار کرتے ہوئے مزید کہا گیا ہے کہ امریکی صدر جوبائیڈن اور ان کی انتظامیہ اسرائیل سے دوستی نبھا رہے ہیں۔
یاد رہے کہ امریکا نے اقوام متحدہ کی سلامتی کونسل میں الجزائر کی غزہ میں جنگ بندی کی قرارداد کو ویٹو کردیا حالانکہ اس قرارداد کے حق میں 13 ارکان نے ووٹ ڈالے تھے اور برطانیہ نے ووٹنگ میں حصہ نہیں لیا تھا۔