ایک نیوز: وزیر اطلاعات و ثقافت عامر میر کی ہدایت پر ہوم ڈیپارٹمنٹ پنجاب نے کارروائی کرتے ہوئے 18 ڈانسرز پر پنجاب بھر میں پابندی عائد کرنے کا فیصلہ کیا ہے۔
رپورٹ کے مطابق سٹیج ڈراموں میں فحش حرکات کرنے والی 18 ڈانسرز پر پنجاب بھر میں پابندی عائد کرنے کا فیصلہ کیا گیا ہے۔پہلے مرحلے میں ہوم ڈیپارٹمنٹ نے پنجاب آرٹس کونسل کی سفارش پر ڈانسرز کو شو کاز نوٹس جاری کر دیے ہیں۔
ڈانسرز کو اپنا موقف دینے کے لیے ایک ہفتہ دیا گیا ہے،غیر تسلی بخش جواب پر ان ڈانسرز پر صوبہ بھر میں پابندی عائد کر دی جائے گی۔شو کاز ہونے والی ڈانسرز میں مہک بٹ، کومل چوہدری، قسمت شہزادی، نایاب خان، شیلا چوہدری، ایان اختر، سونو بٹ، ندا چوہدری، خوشبو خان، روشانی خان، کاجل چوہدری، سارہ خان، تبسم خان، ماہ نور، جیا بٹ، حرا ڈوگر، وفا علی، اور لائبہ جٹی کے نام شامل ہیں۔ہوم ڈیپارٹمنٹ کو آگاہ کیا گیا تھا کہ ڈانسرز سٹیج پر فحاشی اور عریانی پھیلا رہی ہیں۔
عامر میر کی ہدایت پر پنجاب آرٹس کونسل نے شمع تھیٹر، تماثیل تھیٹر، محفل تھیٹر، ناز تھیٹر، ستارہ تھیٹر، الفلاح تھیٹر لاہور، فرینڈز تھیٹر اور میرین تھیٹر ساہیوال کے خلاف بھی کارروائی کے لئے ہوم ڈیپارٹمنٹ کو خط لکھ دیا گیا ہے۔ عامر میر کا کہنا ہےکہ تھیٹرز مالکان بھی فحش تھیٹرز کو فروغ دینے میں ملوث ہیں، ثقافتی اداروں میں فحش مجروں کی اجازت نہیں دی جاسکتی۔ڈراموں کی آڑ میں بیہودگی اور بےحیائی ہرگز قابل قبول نہیں۔ایسی تمام ڈانسرز کے خلاف کریک ڈاؤن کا آغاز کر دیا گیا ہے۔پنجاب آرٹس کونسل کی ٹیمیں تمام تھیٹرز میں ڈراموں کو مانیٹر کر رہی ہیں،جہاں بھی غیر اخلاقی پرفامنس ہوگی وہاں ایکشن لیا جائے گا۔