ایک نیوز: بھارت کے سابق کرکٹرز ایشیا کپ کیلئے ٹیم کی سلیکشن پر پھٹ پڑے۔
رپورٹ کے مطابق سابق آل راؤنڈر مدن لعل کا کہنا ہےکہ سلیکٹرز اور ٹیم مینجمنٹ کو لوکیش راہول کی فٹنس کا یقین ہی نہیں، ان کو کیا انجری ہے اس کی وضاحت کرنی چاہیے۔مدن لعل نے کہا کہ شریاس ائیر کی فٹنس کا بھی یقین نہیں ہے، ان دونوں نے مقابلے کی کرکٹ نہیں کھیلی ہوئی۔کرکٹرز کو میچ فٹنس ثابت کرنے پر اسکواڈ میں شامل کرنا چاہیے تھا۔ نیٹ اور میچ میں بیٹنگ کرنا دو مختلف چیزیں ہیں، لیگ اسپنر چہل کو منتخب نہ کرنا حیران کن ہے۔
سابق بھارتی کرکٹر ساروو گنگولی نے کہا کہ میں ہوتا تو ہر صورت میں چہل کو ٹیم میں منتخب کرتا۔بھارت کے سابق فاسٹ بولر عرفان پٹھان کا کہنا تھاکہ جسپریت بھمرا اور پرسدھ کرشنا ایک وقفے کے بعد ٹیم میں آرہے ہیں، یہ پریشان کن بات ہے۔ بھارت کو ایک اضافی باؤلر کے ساتھ کھیلنا ہو گا جو بیٹنگ بھی کر سکتا ہو، میرے اسکواڈ میں چہل ضرور ہوتا۔
سنجے منجریکر نے کہا کہ مجھے کے ایل راہول کی سلیکشن پر فکر مندی ہے وہ فٹ نہیں ہے، ان کو اور شریاس ائیر کو ابھی زیادہ سے زیادہ میچز کھیلنے کی ضرورت ہے۔
واضح رہے کہ گزشتہ روز ایشیا کپ کے لیے بھارتی کرکٹ ٹیم کا اعلان کیا گیا تھا۔بھارتی کرکٹ بورڈ نے ایشیا کپ کے لیے 17 رکنی اسکواڈ کا اعلان کیا تھا اور روہت شرما کو ٹیم کا کپتان برقرار رکھاتھا جبکہ کے ایل راہول اور جسپریت بھمرا کی ٹیم میں واپسی ہوئی ہے۔
ویرات کوہلی، شُبمن گِل، شریاس ائیر، سوریا کمار یادیو، تلک ورما، ایشان کشن، ہردک پانڈیا، رویندرا جڈیجا، اکشر پٹیل اور شردل ٹھاکر اسکواڈ کا حصہ ہیں۔اس کے علاوہ محمد شامی، محمد سراج، کلدیپ یادیو اور پرسدھ کرشنا اسکواڈ میں شامل ہیں۔