ایک نیوز: وفاقی وزیر مواصلات، نجکاری و سرمایہ کاری بورڈ عبدالعلیم خان نے کہا ہے پاکستان پوسٹ اپنا ریونیوبڑھانے کے اہداف میں اضافے کرے۔
تفصیلات کے مطابق وفاقی وزیر مواصلات، نجکاری و سرمایہ کاری بورڈ عبدالعلیم خان کی زیر صدارت پاکستان پوسٹ کا جائزہ اجلاس ہوا۔
اجلاس کو بریفنگ میں بتایا گیا کہ پاکستان پوسٹ نے گزشتہ سال کی نسبت رواں سال میں اب تک 23.5 فیصد زائد محصولات حاصل کیے ہیں، پاکستان پوسٹ اپنی کارکردگی میں اضافے کیلئے سہ جہتی حکمت عملی پر کار بند ہے، پاکستان پوسٹ کے بزنس میں اضافہ، اخراجات میں کمی اور خدمات میں بہتری حکمت عملی کا حصہ ہیں، پاکستان پوسٹ نے 1.4 بلین روپے مالیت کے نئے کاروبار بڑھانے کے اقدامات لئے ہیں،اخراجات میں کمی کے اقدامات سے رواں مالی سال 2.4 بلین روپے کی بچت ہوگی، بقایا جات کی وصولی اور پوسٹ آفس کی بلڈنگز کو کرایہ پر دینے سے بھی محصولات میں اضافہ ہوگا ۔
وفاقی وزیر مواصلات عبدالعلیم خان نے پاکستان پوسٹ کو 30 جون تک اپنا ریونیو 14 ارب تک بڑھانے کا ٹاسک سونپ دیا ۔
اس موقع پر عبدالعلیم خان نے کہا پاکستان پوسٹ کے بہتر بزنس ماڈل سے گزشتہ چند ماہ میں مثبت تبدیلی نظر آنے لگی ہے، ہمیں کفایت شعاری کے ساتھ ساتھ غیر ضروری اخراجات میں کمی لانا ہو گی، مضبوط اور موثر مارکیٹنگ نیٹ ورک سے پاکستان پوسٹ کو منافع بخش بنایا جا سکتا ہے۔
وفاقی وزیر مواصلات نے پاکستان پوسٹ کو فریم ورک تبدیل کرنے اور عالمی معیار کی کورئیر کمپنی بنانے کا ٹاسک دیتے ہوئے ہدایت کی کہ اپنے ادارے میں پیشہ وارانہ مہارت لا کر ملازمین کا روزگار بچائیں، ڈاک کی ترسیل کا نظام جدت اختیار کر چکا، پاکستان پوسٹ کو موجودہ تقاضوں میں ڈھالیں، پاکستان پوسٹ اپنے ریونیو کو بڑھانے کے اہداف میں اضافہ کرے، پاکستان پوسٹ نجی اداروں کا مقابلہ کرنے کے لئے ڈیجیٹیلائزیشن کو یقینی بنائے۔