ایک نیوز نیوز: امریکی ریاست شمالی کیلیفورنیا میں آنے والے 6.5 شدت کے زلزلے نے علاقے میں تباہی مچادی ہے۔ کئی مکانات منہدم ہونے کی اطلاعات ہیں۔
تفصیلات کے مطابق امریکی حکام کا کہنا ہے کہ شمالی کیلی فورنیا میں آنے والے زلزلے کے بعد ملبے تلے دب کر 2 افراد جاں بحق اور 12 سے زائد زخمی ہوگئے ہیں۔
امریکی زلزلہ پیما مرکز کے مطابق زلزلے کا مرکز کیلی فورنیا کے علاقے ہمبولڈ کاؤنٹی سے 25 میل دور تھا اور اس کی گہرائی 15 کلومیٹر تھی۔
امریکی میڈیا کا کہنا تھا کہ 6.5 شدت سے آئے اس زلزلے سے انفراسٹرکچر کو بہت نقصان پہنچا ہے جبکہ سینکڑوں علاقے تاحال بجلی کی سہولت سے محروم ہیں۔
ہمبولڈ کاؤنٹی شیرف کے دفتر کا کہنا ہے کہ 2 افراد زلزلے کے دوران مختلف حادثات میں جاں بحق ہوئے، کاؤنٹی میں ایمرجنسی کی صورتحال ہے۔
امریکی جیولوجیکل سروے کے مطابق زلزلے کے بعد 80 سے زائد آفٹر شاکس محسوس کئے گئے جس کے باعث تاحال لوگ خوف میں مبتلا ہیں۔