ایک نیوز: کراچی کی مختلف جامعات کی انتظامیہ نے رواں سال پاس آؤٹ ہونے والے طلبا کو لیپ ٹاپ نہ دینے کا عندیہ دے دیا۔
انتظامیہ کی اس من مانی کے بعد متعدد طلبا وزیراعظم لیپ ٹاپ اسکیم کے تحت ملنے والے لیپ ٹاپ لینے سے قاصر ہیں۔
وزیر اعظم لیپ ٹاپ اسکیم میں متعدد یونیورسٹی انتظامیہ کی مان مانی کے باعث طلبا میں مایوسی پھیل گئی ہے۔
ذرائع نے بتایا ہے کہ کراچی کی ڈاؤ میڈیکل یونیورسٹی انتظامیہ نے فیصلہ کیا ہے کہ جو طلبا پاس آؤٹ ہورہے ہیں ان کو لیپ ٹاپ نہیں دیے جائیں گے۔
واضح رہے کہ کہ لیپ ٹاپ دینے کے لیے وزیراعظم آفس نے تمام جامعات سےطلبا کی فہرست مانگی تھی اوریونیورسٹی انتظامیہ نے وزیر اعظم آفس کو طلبا کی فہرست ارسال کی۔
وزیراعظم آفس کی جانب سے جانچ کے بعد طلبا کی مکمل تفصیل کے ساتھ فہرست واپس جامعات کو بھیج دی گئی تھی۔ڈاؤ میڈیکل یونیورسٹی انتظامیہ کو ملنے والی فہرست میں متعدد طلبا اس سال پاس آؤٹ ہوجائیں گے۔
اس حوالے سے متاثرہ طلبا کا کہنا ہے کہ پاس آؤٹ ہونے والے طلبا کو لیپ ٹاپ نہیں دیے جانے تھے تو جامعات انتظامیہ نے ایسے طلبا کی فہرست کیوں دی۔
ذرائع کا مزید دعویٰ ہے کہ ڈاؤ یونیورسٹی سمیت دیگر جامعات کے طلبا اس فیصلے کے سبب لیپ ٹاپ لینے سے قاصر ہیں اور متاثرہ طلبعلموں نے ارباب اختیار سے نوٹس لینے کا مطالبہ کیا ہے۔