ایک نیوز: پاک فوج کا عوامی خدمت کا سلسلہ جاری ہے۔ پاکستان آرمی کے زیر اہتمام کراچی کے علاقے لیاری میں مفت طبی کیمپ لگایا گیا۔
تفصیلات کے مطابق لیاری کے مستحق افراد کو پاک فوج کے زیرِ اہتمام میڈیکل کیمپس سے بھرپور فائدہ پہنچانے کا انتظام کیا گیا۔ مفت میڈیکل کیمپ میں 355 خواتین , 250 مرد , 285 بچوں سمیت 890 مریضوں کا چیک اپ کیا گیا۔
فری میڈیکل کیمپ میں فرسٹ ایڈ, ای سی جی, ویکسینیشن, او ٹی, ڈیٹینشن روم, فری ٹیسٹ اور مفت ادویات کی سہولیات مہیا کی گئیں۔ مریضوں کو الٹراساؤنڈ اور ایکس رے کی سہولیات بھی فراہم کی گئی۔ پاک آرمی کے 5 ایم اوز کے ساتھ 6 سویلین ایم اوز نے مریضوں کا چیک اپ کیا۔
مریضوں کو پاک آرمی کی میڈیکل ٹیم کی جانب سے مفت تشخیص کے علاوہ مختلف جان لیوا بیماریوں سے آگاہی بھی فراہم کی گئی۔ علاقہ مکینوں نے پاک فوج کے اس احسن اقدام کو بے حد سراہا۔