ویب ڈیسک :چیئرمین استحکام پاکستان پارٹی جہانگیرترین کاکہنا ہے کہ اقتدار میں آکرجنوبی پنجاب اور پاکستان کو مثالی بنائیں گے۔
چیئرمین استحکام پاکستان پارٹی جہانگیر ترین کا لودھراں میں ورکرز کنونشن سے خطاب کرتے ہوئے کہنا تھا کہ آئی پی پی عوام کی خدمت کے لئے بنی ہے ۔اقتدار میں آکر ایسے کام کریں گے جس سے ملک اور عوام خوشحال ہونگے۔ملک مضبوطی سے چلے گا تو سب کچھ ٹھیک ہوگا۔ایماندار اور سمجھدار لوگوں کے اوپر آنے سے معیشت ٹھیک ہوگی ۔معیشت مضبوط ہوگی تو پاکستان ترقی کریگا۔بیرون ملک اس لیے ترقی یافتہ ہیں کہ انکی معیشت مضبوط ہے۔
جہانگیرترین کاکہنا تھا کہ ایسا خوشحال ملک بنائیں گے جہاں نوجوان کو باعزت روزگار ملے گا۔ہمارا منشور عوام دوست ہے۔لوگوں کو تھانہ کچہری کی سیاست سے نجات دلاؤں گا۔عوام کے ساتھ ظلم و جبر کرنے والوں کی ایسی تیسی کر دیں گے ۔لودھراں نے ہمیشہ مجھے عزت دی، یہاں کے لوگ میرے دل کے قریب ہیں ۔اپنے بیٹے کو نصحیت کی ہے کہ ہمیشہ لودھراں کے عوام کی خدمت جاری رکھنی ہے۔