ایک نیوز:سندھ سے سینیٹ کی خالی جنرل نشست پر پیپلزپارٹی سندھ کے صدر نثار کھوڑو بلا مقابلہ سینیٹر منتخب ہوگئے ہیں۔
تفصیلات کے مطابق نثار کھوڑو کے دو کورنگ امیدوار پیپلز پارٹی سندھ کے سینیئر نائب صدر سرفراز راجڑ اور اطلاعات سیکریٹری عاجز دھامراہ دستبردار ہوگئے۔الیکشن کمیشن کے شیڈول کے تحت اُمیدواروں کے دستبردار ہونے پر آخری تاریخ 20جنوری مقرر کی گئی تھی۔نثار کھوڑو کے بلا مقابلہ سینیٹر منتخب ہونے کا الیکشن کمیشن کیجانب سے آج نوٹیفیکیشن جاری ہونے کا امکان ہے۔
نثار کھوڑو کے مقابلے میں کسی اور جماعت کے امیدوار نے کاغذات نامزدگی جمع نہیں کروائے تھے۔پیپلز پارٹی کے3 امیدواروں نے کاغذات نامزدگی جمع کرائے جن میں نثارکھوڑو ،عاجز دھامرہ اور سرفراز راجڑ شامل تھے۔
عاجز دھامرہ پہلے ہی کاغذات نامزدگی واپس لے چکے تھے، آج سرفراز راجڑ نے بھی کاغذات واپس لے لیے ہیں۔
اس موقع پر پاکستان پیپلز پارٹی کے رہنما نثار کھوڑو نے کہا ہے کہ سینیٹ کا ٹکٹ دینے پر پارٹی قیادت کا مشکور ہوں، کراچی میں پیپلز پارٹی کو مینڈیٹ ملا ہے، اسے سب کو تسلیم کرنا چاہیے، پیپلز پارٹی نے ہمیشہ سب کے مینڈیٹ کا احترام کیا ہے، پیپلز پارٹی کے کراچی سے اب بھی پانچ ایم این ایز ہیں۔
واضح رہے کہ سپریم کورٹ کے فیصل واوڈا کیس سے متعلق فیصلہ کے بعد سینیٹ کی نشست خالی ہوگئی تھی۔