پیپلزپارٹی چند سیٹوں پر نقصان کے ڈر سےمردم شماری پر اعتراض کررہی ہے، راناثناءاللہ

ایک نیوز: سابق وفاقی وزیر داخلہ رانا ثناء اللہ نے کہا ہے کہ پیپلزپارٹی الیکشن میں چند سیٹوں پر نقصان کے ڈر سے مردم شماری پر اعتراض کر رہی ہے۔

نجی ٹی وی کے پروگرام میں گفتگو کرتے ہوئے سابق وزیرِ داخلہ کا کہنا تھا کہ انتخابات میں 90 دن کی تاخیر سے کوئی فرق نہیں پڑے گا، پیپلز پارٹی چند سیٹوں پر نقصان کے ڈر سے مردم شماری پر اعتراض کر رہی ہے۔

انہوں نے کہا کہ مشترکہ مفادات کونسل نے اتفاق رائے سے مردم شماری کی منظوری دی اور کونسل میں پیپلز پارٹی کی نمائندگی بھی تھی، اس مردم شماری پر پوری قوم کو اعتماد ہے، نئی مردم شماری کے بعد نئی حلقہ بندیاں آئینی تقاضا ہے۔

دوسری جانب سابق وفاقی وزیراطلاعات شیری رحمان کا بھی کہنا تھا کہ پیپلزپارٹی نے مشترکہ مفادات کونسل کے اجلاس میں اس بات پر اتفاق کیا تھا کہ موجودہ نشستیں تبدیل نہیں ہوں گی۔

شیری رحمان نے مزید کہا تھا کہ حلقہ بندیوں سے متعلق 4 ماہ لگنے کا الیکشن کمیشن کا اعلان تشویش اور مایوسی کا سبب ہے، الیکشن کمیشن اپنے فیصلے پر سنجیدگی سے نظرثانی کرے۔