پاکستان کب تک قرضے لیتا رہے گا؟ہمیں جان چھڑانا ہوگی، شہبازشریف

ایک نیوز :وزیراعظم شہباز شریف نے کہا ہے کہ پاکستان کب تک قرضے لیتا رہے گا؟ ہمیں قرضوں سے جان چھڑانی ہوگی، قومیں وہی کامیاب ہیں جو قرض لے کر اسے کامیابی کے ساتھ واپس کردیں۔

تفصیلات کےمطابق پرائم منسٹر نیشنل انوویشن ایوارڈز کی تقریب سے خطاب کرتے ہوئے وزیراعظم نے کہا کہ چین پاکستان کا بھرپور ساتھ دے رہا ہے، چین سے ایک ارب ڈالر آچکے ، چین کے بارے میں بعض لوگوں نے ایسے جملے کسے اور بے جا باتیں کی جس سے چین ناراض ہوا۔
انہوں نے کہا کہ  نوجوانوں سے ملاقات کرکے خوشی ہوئی، وہ ہر شعبے میں اپنی صلاحیتوں کو منوارہے ہیں، پاکستان کا مستقبل نوجوانوں کے ہاتھوں میں ہے، نوجوانوں کے پاس ایک ہنر ضرور ہونا چاہی اور انہیں چاہیے کہ وہ عالمی مارکیٹ میں اپنی جگہ بنائیں۔

وزیراعظم نے کہا کہ ہم نے بچوں کے ہاتھوں میں لیپ ٹاپ دیے کلاشنکوف نہیں اور لیپ ٹاپ بھی ہم نے میرٹ کے بغیر کسی کو نہیں دیے، انہیں مختلف تعلیمی وظائف دیے تاکہ ملک کا مستقبل روشن ہو۔

شہباز شریف نے کہا کہ پاکستان پر قرضوں کا بہت بڑا بوجھ ہے، 75 برس میں مختلف ادوار میں قرضوں کی بھرمار کی گئی، پاکستان کب تک قرضے لیتا رہے گا؟ ہمیں قرضوں سے جان چھڑانی ہوگی، قومیں وہی کامیاب ہیں جو قرض لے کر اسے کامیابی کے ساتھ واپس کردیں، امید رکھیں پاکستان جلد مشکلات سے نکل جائے گا، ہم پاکستان کا کھویا ہوا وقار اسے واپس دلائیں گے۔