ایک نیوز: شیخ رشید احمد کا کہنا ہے کہ ہم اپنے 300 پاکستانیوں کا سوگ منا رہے ہیں، لوگ بیروزگاری اور معاشی قتل عام سے بچنے کیلئے یونان کے سمندر میں شہید ہوگئے۔
تفصیلات کے مطابق سماجی رابطوں کی ویب سائٹ ٹوئٹر پر پیغام جاری کرتے ہوئے شیخ رشید کا کہنا تھا کہ یہ پہلا واقعہ نہیں ہے، جب 20 کلو آٹے کا تھیلا 3000 روپے کا ہوگا تو لوگ زہر کا گھونٹ پینے پر مجبور ہوں گے، معاشی، اقتصادی اور سیاسی تباہی، کارخانے بند، کاروبار بند، کسی کو کچھ سمجھ نہیں آ رہی کہ اس اندھیرے سے کس طرح نکلنا ہے۔
شیخ رشید کا کہنا ہےکہ 9 مئی کے واقعہ کی ساری قوم نے مذمت کی ہے، خدا کیلئے اس قوم کو زندہ رہنے کا حق دو۔ لوگوں کے گھروں میں ایک وقت کا کھانا ہے، قومیں عوام سے ہوتی ہیں، قومیں جوش، جذبے، ولولے سے زندہ رہتی ہیں، اس قوم کو جذبہ اور امید دیں نا امیدی نہ دیں، پاکستان قیامت تک زندہ رہے گا۔
شیخ رشید کا مزید کہنا ہے کہ بجٹ میں سب جھوٹ بولا گیا ہے۔ اسحاق ڈار، نوازشریف اور شہبازشریف کے بیانات نہیں مل رہے۔ نوازشریف آ جائیں آپ کو پتہ لگے گا کہ لوگ کس حالت میں پہنچ چکے ہیں، آنے میں دیر نہ کریں۔ میری اداروں سے درخواست ہے کہ اس پاکستان کو اندھیروں سے نکالیں، اس پاکستان کو اجالے میں لے کر جائیں اور امید دلائیں۔
سابق وزیر نے مزید کہا کہ نوجوان ڈپریشن اور دباؤ کا شکار ہو چکا ہے۔گھروں میں صف ماتم بچھی ہوئی ہے، آئیں سب مل کر پاکستان کو آگے لے کر چلیں، پاکستان ہے تو ہم ہیں، پاکستان ہماری پہچان ہے۔
https://www.pnntv.pk/uploads/digital_news/2023-06-19/news-1687162836-8979.mp4