مراکش کشتی حادثہ :ترجمان دفتر خارجہ کی 21پاکستانیوں کے بچ جانے کی تصدیق 

 ایک نیوز: ترجمان دفتر خارجہ نےمراکش کے قریب کشتی حادثے میں 21 پاکستانیوں کے زندہ بچ جانے کی تصدیق کر دی۔
 رباط میں پاکستانی سفارت خانے کو فوری طور پر شہریوں کی مدد کے لیے متحرک کر دیا گیا، پاکستانی سفارت خانے نے خوراک، پانی، ادویات اور ملبوسات کا فوری بندوبست کیا ، مراکش کی بندرگاہ دخلہ کے مقامی حکام پاکستانی شہریوں کو پناہ اور طبی امداد فراہم کر رہے ہیں ۔
ترجمان دفتر خارجہ کا کہنا ہے کہ مراکش میں پاکستانی سفارت خانے کی قونصلر ٹیم دخلہ میں موجود ہے، پاکستان نے سفارت خانے کی قونصلر ٹیم ریلیف آپریشن کی نگرانی کر رہی ہے، حکومت پاکستان متعلقہ حکام کے ساتھ مل کر پاکستانی شہریوں کو امداد فراہم کر رہی ہے۔
ترجمان دفتر خارجہ کے مطابق حکومت پاکستان متعلقہ حکام کے ساتھ پاکستانی شہریوں کی واپسی کا طریقہ کار بھی طے کر رہی ہے پاکستان بیرون ملک اپنے شہریوں کے تحفظ کے لیے پرعزم ہے اور صورتحال کی نگرانی جاری رکھی جائے گی ۔