لیول پلیئنگ فیلڈ مانگنے والو آؤمیدان میں آ کر مقابلہ کرو،مریم نواز 

ویب ڈیسک :مسلم لیگ ن کی چیف آرگنائزرمریم نواز کاکہنا ہے کہ لیول پلیئنگ فیلڈ مانگنے والو آؤمیدان میں آ کر مقابلہ کرو،آج میدان میں مقابلہ کرنیوالا کوئی نہیں وہ جوتیاں چھوڑ کر بھاگ گئے ہیں۔
مسلم لیگ ن کی چیف آرگنائزرمریم نواز کا خانیوال میں ا نتخابی جلسے سے خطاب میں کہنا تھا کہ یہاں پرموجود لوگوں کا شکریہ جو اتنی سرد ی میں یہاں آئے۔کہتے تھے اتنی مہنگائی ہے تو کون مسلم لیگ ن کیلئے نکلے گا ۔نوزشریف واپس آیا ہے تو اس کی وجہ سے خانیوال میدان چھوڑ کر نہیں بھاگا۔ خانیوال نے ہمیشہ شیر کا ساتھ دیا ہے، خانیوال والوں نے شیر کے علاوہ کسی کو گھسنے نہیں دیا۔سیاست میں اتار چڑھاؤ آتارہتا ہے لیڈر وہ ہوتا ہے جو ڈر کر نہ بھاگے۔2018میں ن لیگ کو دھاندلی سے الیکشن ہرایاگیا۔نوازشریف کو 2018میں ہرانے کیلئے آر ٹی ایس کو بند کرنا پڑا۔
مریم نواز کاکہنا ہے کہ ن لیگ کے جلسے میں عوام کا سمندر بتاتاہے کہ مہنگائی کا ذمے دار نوازشریف نہیں۔کیا نوازشریف نے کہا تھا جھوٹاسائفر لہراؤ،جعلی انٹراپارٹی الیکشن کراؤ۔ کیا نوازشریف نے کہا تھا پیٹرول بم چلاؤ،شہدا کی یادگاروں پرحملے کرو۔نوازشریف قومی راز سینے میں دفن کرکے چپ کر کے چلاگیا۔
ن لیگ کی نائب صدر کاکہنا تھا کہ آپ کی اس بیٹی نے بھی مشکل کا سامنا کیا، مجھے ماں کی موت کی خبر اڈیالہ جیل میں دی گئی، نہ میں نے اپنے باپ کا سر جھکنے دیا اور نہ عوام کا۔
 مریم نواز کاکہنا تھا کہ  نواز شریف تم سے انتقام نہیں لے رہا، نواز شریف نے اپنا معاملہ اللہ پر چھوڑا تھا، آج جو نوجوان جیل میں ہیں ان کو تم نے 9 مئی کو حملہ کرنے کی ترغیب دی تھی۔ پاکستان کے ایک کونے سے دوسرے کونے نواز شریف کے ترقیاتی کاموں کے نشان ہیں، 8 فروری کو گھر میں کسی نے نہیں رہنا، آپ نے شیر پر ٹھپہ لگانا ہے۔