ایک نیوز :سابق کپتان قومی کرکٹ ٹیم انضمام الحق کاکہنا ہے کہ چیف سلیکٹر کے لیے مجھ سے رابطہ نہیں کیا گیا ۔جب کوچ یا چیف سلیکٹر کی آفر ہوگی تو دیکھوں گا۔
سابق کپتان قومی کرکٹ ٹیم انضمام الحق کامیڈیا سے گفتگو میں کہنا تھا کہ کسی بھی پلئیر پر پریشر ہو تو اس کی پرفارمنس متاثر ہوتی ہے۔بابر اعظم کی تین فارمیٹ میں پرفارمنس بہترین ہے ۔بابر پر پریشر نہیں ہے لیکن کپتانی وقت کے ساتھ ہی آتی ہے ۔بابر کو مزید کپتانی کا موقع ملنا چائیے ۔اگر آپ چاہتے ہیں کہ بابر اچھا کپتان بنے تو اسے مزید موقع دینا چاہیے۔
انضمام الحق کا کہنا تھا کہ کھیلوں کے حوالے سے پاکستان کا موقف ہمیشہ مثبت رہا ہے ۔افغانستان ہو یا انڈیا کرکٹ کھیلنی چاہیے۔
سابق کپتان کا کہنا تھا کہ فارن کوچ ہی پاکستانی ٹیم کا حل نہیں ہے پاکستانی کوچز بھی اچھے ہیں ۔دیکھنا یہ ہے کہ فارن کوچ یا لوکل کوچ پاکستان ٹیم کو بہتر کر سکتا ہے ۔میرے دور میں مکی آرتھر نے بہت اچھا کام کیا ۔ہمارے کوچز ثقلین مشتاق اورمحمد یوسف بھی اچھا کام کر رہے ہیں ۔فارن اور لوکل کی بات نہیں جو بھی کھیلا ہوا ہے کوئی بھی کوچنگ کر سکتا ہے۔
انضمام الحق کا مزید کہنا تھا کہ پشاور سمیت پورے پاکستان میں پی ایس ایل کے میچز کا انعقاد ہونا چاہیے۔اگر پی ایس ایل کے میچز پورے پاکستان میں ہوں گی تو انٹرنیشنل ٹیمیں مختلف وینیوز پر کھیلنے کے لیے رضامند ہوں گی۔