ایک نیوز: وزیراعظم شہباز شریف کا بیرون ملک سفار ت خانوں کی کارکردگی بڑھانے کا ٹاسک، نائب وزیراعظم اسحاق ڈار نے خصوصی ذیلی کمیٹی قائم کر دی۔
تفصیلات کے مطابق ذیلی کمیٹی نائب وزیراعظم اور وزیر خارجہ اسحاق ڈار کی ہدایت پر قائم کی گئی ہے ،رکن قومی اسمبلی بلال اظہر کیانی کو 8رکنی ذیلی کمیٹی کے کنوینئر مقرر کردیا،کابینہ ڈویژن کی جانب سے نوٹیفکیشن بھی جاری کردیاگیا۔
ذیلی کمیٹی کا پہلا اجلاس کل (جمعرات) کو بلال اظہر کیانی کی صدارت میں ہوگا ،داخلہ، تجارت،خارجہ،خزانہ، اطلاعات ونشریات اور اوورسیز پاکستانیزکی وزارتوں کے ایڈیشنل سیکرٹری ذیلی کمیٹی کے رکن ہوں گے ،کابینہ ڈویژن کے ادارہ جاتی اصلاحات سیل کے جوائنٹ سیکریٹری کو بھی ذیلی کمیٹی کا رکن مقرر کیاگیا ہے ۔
ذرائع کا کہنا ہے ذیلی کمیٹی جامع تجاویز اسحاق ڈارکی سربراہی میں قائم ’ریشنائلائزنگ پاکستانز مشنز اَبراڈ‘ کی مرکزی کمیٹی کو پیش کرے گی ، پاکستانی سفارت خانوں کی مجموعی کارکردگی، ڈھانچے، درپیش مسائل کا تفصیلی تجزیہ کرے گی ، پاکستانی سفیروں کو بھی فرداً فرداً بلائے گی اور ان سے تجاویز لے گی ، پاکستانی سفارت خانوں کی سیاسی ومعاشی کاوشوں کا جائزہ لے گی ،ذیلی کمیٹی یہ بھی تجویز کرے گی کہ کس ملک میں سفارت خانے کے کام کی نوعیت کیا ہے؟سفارتی عملے کی تعداد کتنی ہے؟ ،ذیلی کمیٹی یہ دیکھے گی کہ کن ممالک میں پاکستانی سفارت خانوں کا حجم ،امور کی انجام دہی کا دائرہ کارکیا ہو اور کتنی افرادی قوت ہونی چاہئے۔
ذیلی کمیٹی پاکستانی سفارت خانوں کی کارکردگی بڑھانے، موجودہ حالات کے مطابق اصلاحات کیلئے اقدامات بھی تجویز کرے گی ، پاکستانی سفارت خانوں کیلئے قومی ضروریات اور مقاصد کے مطابق اہداف کا تعین بھی کرے گی ، پاکستانی سفارت خانوں اور سفارت کاروں کی کارکردگی جانچنے کیلئے طریقہ کار کے تعین سے متعلق بھی تجاویز دے گی ،ذیلی کمیٹی کو اختیار دیاگیا ہے کہ وہ اپنے کام کی انجام دہی کے لئے کسی ماہر اور سفارتی شخصیت کی مدد بھی حاصل کرسکتی ہے ، بیرون ملک تعینات پاکستانی سفیروں کو ہدایت کی گئی ہے کہ وہ ذیلی کمیٹی کو اس کے کام کی انجام دہی میں مکمل معاونت فراہم کریں۔
واضح رہے کہ پاکستا نی سفارت خانوں کی اصلاح اور کارکردگی بڑھانے کے لئے قائم مرکزی کمیٹی نے 15 فروری کو ذیلی کمیٹی بنانے کا فیصلہ کیا تھا،وزیراعظم محمد شہباز شریف نے پاکستانی سفارت خانوں کی کارکردگی بڑھانے اور فعال بنانے کے لیے اسحاق ڈار کی سربراہی میں کمیٹی قائم کی تھی۔