ایک نیوز: وفاقی وزیر اطلاعات عطاءاللہ تارڑ نے ریاض میں سعودی عرب کے وزیر برائے میڈیا سلمان بن یوسف الدوسیری سے ملاقات کی ہے۔
تفصیلات کے مطابق ملاقات میں وفاقی وزیر اطلاعات نے سعودی عرب کے وزیر اطلاعات کو سعودی میڈیا فورم کے چوتھے ایڈیشن کے انعقاد پر مبارکباد پیش کی ۔
ملاقات میں پاکستان اور سعودی عرب کے درمیان مشترکہ پروڈکشن، گانے، فلم اور ڈاکومنٹریز کی تیاری کے لئے جوائنٹ کمیٹی تشکیل دینے اور صحافیوں کے تبادلے اور تربیتی پروگراموں سمیت مختلف شعبوں میں تعاون بڑھانے پر اتفاق ہوا، پاکستان اور سعودی عرب کے درمیان میڈیا کے شعبوں میں تعلقات کو فروغ دینے اور مشترکہ تعاون کو بڑھانے پر تبادلہ خیال بھی کیا گیا ۔
دونوں رہنما ؤں کی جانب سے غلط معلومات اور پروپیگنڈے سے نمٹنے کے لئے مل کر کام کرنے کی اہمیت پر زور دیا گیا ۔
اس موقع پر وفاقی عطاء تارڑ نے کہاسعودی عرب ہمارا دوسرا گھر ہے، دونوں ممالک کے درمیان قریبی تعاون سے خطے میں امن اور استحکام کو فروغ دینے میں مدد ملے گی، سعودی ویژن 2030ءکی حمایت سمیت مختلف شعبوں میں تعلقات کو مضبوط بنانے کے لئے پرعزم ہیں، پاکستان اور سعودی عرب کے درمیان ڈیجیٹل سرمایہ کاری اور تکنیکی تعاون کے لئے سنہری مواقع موجود ہیں ،سعودی میڈیا فورم کے زیر اہتمام کانفرنس محض تقریب نہیں بلکہ یہ پاکستان سمیت دنیا بھر کے میڈیا کے لئے ایک موقع ہے کہ وہ باہمی تعاون کی نئی راہیں تلاش کریں۔
ان کا مزید کہنا تھا کہ سعودی عرب کے شاہ سلمان بن عبدالعزیز کی زیر پرستی ولی عہد شہزادہ محمد بن سلمان کی قیادت میں سعودی عرب وژن 2030ءکے اہداف سے آگے بڑھ چکا ہے،سعودی ولی عہد شہزادہ محمد بن سلمان شہزادہ نے سعودی عرب کی مثالی ترقی میں تاریخی کردار ادا کیا ہے، ان کی قائدانہ صلاحیتوں کو خراج تحسین پیش کرتے ہیں ،2030ءوژن کے تحت سعودی عرب ہر شعبے کی سرگرمیوں کا مرکز بن چکا ہے، پاکستان سعودی عرب برادرانہ تعلقات اقتصادی شراکت داری میں تبدیل ہو رہے ہیں، پاکستان اور سعودی عرب کے درمیان دہائیوں پر محیط برادرانہ تعلقات ہر گزرتے دن کے ساتھ مزید مضبوط ہو رہے ہیں ۔
دوسری جانب سعودی وزیر برائے میڈیا سلمان بن یوسف الدوسیری نے کہا کہ سعودی پاکستان سپریم کوآرڈینیشن کونسل کی آئندہ میٹنگ پاکستان میں ہوگی، پاکستانیوں کی بڑی تعداد سعودی عرب کی ترقی میں اہم کردار ادا کر رہی ہے، پاکستان کے ساتھ اطلاعات سمیت تمام شعبوں میں تعاون کا فروغ ہماری ترجیح ہے ۔