چیمپئنز ٹرافی ،کراچی میں فول پروف سیکیورٹی انتظامات

ایک نیوز: کراچی میں ہونے والی چیمپئنز ٹرافی میچز کے حوالے سے فول پروف سیکیورٹی انتظامات کو حتمی شکل ایس ایس یو ہیڈ کوارٹرز میں ہونے والے اجلاس میں دی گئی ۔
اجلاس کی صدارت ڈی آئی جی سیکیورٹی ڈاکٹر مقصود احمد نے کی، میچ دیکھنے آنے والے شائقین کے لیے خصوصی ہدایات بھی جاری کی گئیں،ایس ایس یو اور دیگر قانون نافذ کرنے والے اداروں کے6700 سے زائد اہلکار تعینات، شیڈول کے مطابق 19، 21 فروری اور1مارچ 2025 کو میچز نیشنل بینک کرکٹ سٹیڈیم میں کھیلے جائینگے۔
  سیکیورٹی پلان کے مطابق ایس ایس یو کے1045 کمانڈوزبشمول لیڈی کمانڈوز اپنے فرائض انجام دے رہے ہیں ، سیکیورٹی ڈویژن کے1745، ٹریفک پولیس کے 1390، سپیشل برانچ کے328 اپنے فرائض انجام دے رہے ہیں، اہلکارنیشنل بینک کرکٹ اسٹیڈیم، کراچی ایئرپورٹ، روٹس، پارکنگ پوائنٹس، ہوٹلز اور دیگر مختلف مقامات پر مامورہیں ،اس کے علاوہ ماہر نشانہ باز بھی حساس مقامات پر تعینات ہیں ۔
ڈی آئی جی سیکیورٹی ڈاکٹر مقصوداحمد کا کہنا ہے کہ جدید تربیت یافتہ کمانڈوز پر مشتمل ٹیم کسی بھی ہنگامی صورتحال سے نمٹنے کے لیے الرٹ رہے گی،ٹیم سٹیڈ یم کے اطراف گشت پر بھی مامور ہوگی، سندھ پولیس اس بات کو یقینی بنانے کے لیے پرعزم ہے کہ تمام شرکاء کے لیے ایک پر امن اور خوشگوار ماحول فراہم کیا جائے، سیکیورٹی انتظامات دیگر متعلقہ اداروں کے اشتراک کے ساتھ بنایا گیا ہے۔
سٹیڈیم کے اطراف تمام سڑکیں ٹریفک کی آمدورفت کے لیے کھلی رہیں گی ،سر شاہ سلیمان روڈ استعمال کرنے والے عوام الناس کسی بھی زحمت سے بچنے کے لیے میچ کے دوران متبادل راستہ اختیار کریں، نیشنل بینک سٹیڈیم میچ دیکھنے آنے والے شائقین کے لیے پارکنگ کا انتظام سٹیڈیم سے متصل چائنہ گراؤنڈ اور نیشنل کوچنگ سینٹر میں گاڑیوں اور موٹر سائیکلوں کی پارکنگ کے لیے مختص ایکسپو سینڑ بھی پارکنگ کے لیے مختص کیا گیا ہے۔
وی آئی پیز اور خصوصی پاسز کی حامل گاڑیوں کی پارکنگ سٹیڈیم کے اندر رکھی گئی ہے،سٹیڈیم میں داخلے کے لیے صرف مرکزی گیٹ اور گیٹ نمبر 04، 05، 06، 12، 13 اور 14 استعمال کیے جا سکیں گے ،صرف وی آئی پیز اور اسٹیکر/پاسز کی حامل گاڑیاں گیٹ نمبر 8 سے داخل ہوسکیں گی ،سٹیڈیم کے احاطے میں سی این جی سلینڈر نصب شدہ گاڑیوں کے داخلے پر سخت پابندی ہوگی، نیشنل بینک سٹیڈیم کے تمام گیٹ میچ کے شروع ہونے سے3گھنٹے پہلے کھول دیے جائیں گے ۔
تمام تماشائیوں کو داخلی دروازوں پر سیکیورٹی چیکنگ سے گزارا جائے گا، کسی بھی قسم کی پریشانی و زحمت سے بچنے کے لیے میچ شروع ہونے سے قبل تشریف لائیں ، سٹیڈیم میں داخل ہونے کے لیے اپنا اصل قومی شناختی کارڈ لازمی ہمراہ لائیں ،سٹیڈیم میں داخل ہونے کے لیے فزیکل میچ ٹکٹ کا ہونا لازمی ہے ،آن لائن ٹکٹس پر سٹیڈیم میں داخلہ ممکن نہیں ہوگا، آن لائن بک کروائے گئے ٹکٹس ٹی سی ایس کے مقرر کردہ مراکز سے فزیکل ٹکٹس حاصل کر سکتے ہیں ۔
تماشائیوں کو سٹیڈیم میں کھانے پینے کی کوئی بھی چیز لانے کی اجازت نہیں ہوگی ،مشروبات، گلاس، پلاسٹک بوتلیں، یا کوئی بھی نشہ آور اور ممنوع اشیاء لانے کی اجازت نہیں ہوگی ،کھانے پینے اور ریفر یشمنٹ کی اشیاء سٹیڈیم کے اندر لگے سٹالز پر دستیاب ہونگی ،ممنوعہ اشیاء میں آتشی اسلحہ، کھلونا بندوق ، دھماکہ خیز مواد، آتشبازی، سگریٹ شامل ہیں ،اس کے علاوہ میچ باکس، لائٹر، خواتین کے ہینڈبیگ، تیز دھار اشیاء،دھاتی/لکڑی کی اشیاء اندر لانا ممنوع ہیں ،سٹیڈیم اور اسکے اطراف میں ہر قسم کے ڈرون کیمروں کے استعمال پر سخت پابندی ہوگی۔