پر امن اور محفوظ چیمپئنز ٹرافی کا انعقاد پاکستان کی جیت ہے:چیئرمین پی سی بی

ایک نیوز: چیئرمین پی سی بی محسن نقوی کا کہنا ہے کہ 29سال بعد پاکستان میں آج کرکٹ کا بین الاقوامی میلہ سجے گا،8ٹاپ ٹیموں میں کانٹے دار مقابلے ہونگے، شائقین کرکٹ بے تاب ہیں۔
چیئرمین پی سی بی نے کہا کہ کھلاڑی پر جوش ہیں،کراچی کے عالمی معیار کے سٹیڈیم میں آئی سی سی چیمپئنز ٹرافی کا پاکستان اور نیوزی لینڈ کے درمیان پہلا بڑا مقابلہ آج ہوگا، صدر مملکت آصف علی زردار ی کراچی نیشنل بینک سٹیڈیم میں افتتاحی میچ کے مہمان خصوصی ہونگے ۔
انہوں نے کہا کہ پاکستان ائیر فورس کے جانباز آج شیردل شو پیش کریں گے، کراچی نیشنل سٹیڈیم میں پاکستان اور نیوزی لینڈ کا میچ دیکھیں گے، چیمپئنز ٹرافی صرف ایک ٹورنا منٹ نہیں بلکہ ثقافت و تہذیب کو فروغ دینے کاخوبصورت سلسلہ بھی ہے۔
  محسن نقوی کا کہنا تھا کہ تمام ٹیموں کے کھلاڑیوں کو دل کی اتھاہ گہرائیوں سے خوش آمدید کہتے ہیں، چیمپئنز ٹرافی کا انعقاد پرامن اور محفوظ پاکستان کی جیت ہے،میرے سمیت آج ہر پاکستانی کا سر فخر سے بلند ہے،اللہ تعالٰی کا جتنا بھی شکر ادا کروں کم ہے،پاکستانی قوم نے ثابت کیا ہے کہ وہ کرکٹ کے دلدادہ ہیں اور کرکٹ سے محبت کرتے ہیں۔