ویب ڈیسک: وزیر اطلاعات پنجاب عظمیٰ بخاری نے کہا ہے کہ نارووال کا تاریخی جلسہ مخالفین کی آنکھیں کھولنے کے لیے کافی ہے۔
وزیر اطلاعات پنجاب عظمیٰ بخاری نے گزشتہ روز نارووال میں منعقدہ جلسے کی تصویریں شیئر کرتے ہوئے کہا ہے کہ مسلم لیگ (ن) کے جلسے دن کی روشنی میں منعقد ہوتے ہیں، جو ہماری عوامی مقبولیت کا واضح ثبوت ہیں، جو لوگ جلسے کی تعداد گننا چاہتے ہیں یا قریب سے دیکھنا چاہتے ہیں، وہ شوق سے زوم کر سکتے ہیں، نام نہاد ’یوٹیوبرز‘ کو یاد دلانا چاہتی ہوں کہ جو کل تک مسلم لیگ (ن) کے خاتمے کی پیشگوئی کر رہے تھے، نارووال جلسے نے ان کے تمام اندازوں کو غلط ثابت کر دیا ہے۔
انہوں نے کہا کہ وہ ان تجزیہ کاروں کو کیا جواب دیں جو کہتے تھے کہ مسلم لیگ (ن) اب عوام میں نہیں نکل سکتی، نارووال کا تاریخی جلسہ ان کے لیے آنکھیں کھولنے کے لیے کافی ہے۔
عظمیٰ بخاری نے مزید کہا کہ وہ عناصر جو فساد گروپ کے لیڈر کو مقبول بنانے میں لگے ہوئے ہیں، انہیں حقائق کا سامنا کرنا ہوگا، مریم نواز کی ایک سالہ کارکردگی نے تمام بے بنیاد تجزیوں کو غلط ثابت کر دیا ہے اور عوام نے مسلم لیگ (ن) پر اپنے اعتماد کی مہر ثبت کر دی۔